Қытайдың Huawei компаниясы мен америкалық HP компаниясы патенттерді өзара лицензиялау туралы көпжылдық жаһандық келісім жасасты. Келісім аясында HP компаниясы Huawei-дің Wi-Fi технологияларына қатысты белгілі бір патенттерін пайдалану құқығына ие болады, деп хабарлайды «Синьхуа» агенттігі.
Huawei өкілдерінің айтуынша, патенттік лицензиялау компанияға өзінің технологиялық әзірлемелерін нарықтың басқа қатысушыларымен бөлісуге мүмкіндік береді. Компания ақпараттық-коммуникациялық технологиялар саласындағы стандартталған технологияларға ерекше назар аударады.
Huawei-дің патенттік портфелін әлемнің түкпір-түкпіріндегі электроника өндірушілері белсенді пайдаланады. 2025 жылдың соңына қарай компания АҚШ, Еуропа, Жапония, Корея Республикасы және басқа да нарықтардағы ақпараттық-коммуникациялық технологиялар жабдықтарын шығаратын ірі өндірушілермен 260-тан астам лицензиялық келісім жасасты. Тек 2025 жылдың өзінде 34 жаңа келісімге қол қойылды. 2024 жылдың соңындағы жағдай бойынша әлемде 1,2 миллиардтан астам тұтынушылық электрондық құрылғы Huawei-дің Wi-Fi саласындағы патенттері бойынша лицензияланған.
Зияткерлік меншікті лицензиялау Huawei үшін жеке табыс көзіне де айналып келеді. Компанияның мәліметінше, 2024 жылы патенттерді лицензиялаудан түскен кіріс шамамен 630 миллион долларды құрады.
