Қытай Қазақстан, Қырғызстан және Өзбекстанды қоса алғанда, Орталық Азия елдерімен медициналық ынтымақтастықты кеңейтіп келеді. Бірлескен бағдарламалар дәрігерлер даярлауды, телемедицинаны, клиникалық тәжірибе алмасуды, сондай-ақ диагностика мен емдеудің заманауи технологияларын енгізуді қамтиды, деп хабарлайды «Синьхуа» агенттігі.
Осындай ынтымақтастықтың бір мысалы — 2017 жылы Ош облысаралық біріккен клиникалық ауруханасының базасында Шыңжаң медицина университетінің 2-ші ауруханасының қатысуымен құрылған Қытай-Қырғызстан достығы ауруханасы. Соңғы үш жылда Қырғызстанның 30-ға жуық дәрігері Қытайда біліктілігін арттырды. Мамандар диагностика мен емдеудің заманауи әдістерін, соның ішінде неврология және нейрохирургия саласындағы технологияларды меңгеруде.
Қазақстанмен ынтымақтастық та белсенді дамып келеді. 2026 жылы қытайлық онкологтар тобы Алматыда кәсіби тәжірибе алмасып, жергілікті үш медициналық мекемемен ұзақ мерзімді серіктестік байланыстар орнатты. Қазақстандық үш ортопед дәрігер Шыңжаңда мамандандырылған тағылымдамадан өтіп, буындарды роботтың көмегімен эндопротездеу технологияларын меңгерді. Өзбекстанда дәстүрлі қытай медицинасының мамандары дәрістер өткізіп, клиникалық консультациялар берді және ортопедиялық оңалту саласында оқыту жүргізді.
Трансшекаралық медициналық байланыстардың ауқымы одан әрі кеңейіп келеді. 2025 жылы Шыңжаң медицина университетіне қарасты ауруханалар 5 882 шетелдік пациентті қабылдады, бұл бір жыл бұрынғы көрсеткіштен 23 пайызға көп. Осы кезеңде Орталық Азия елдеріне техникалық қолдау көрсету, консультациялар өткізу және кәсіби оқыту мақсатында құрамында 97 медицина маманы бар 25 топ жіберілді.
