Қытайлық және британдық ғалымдар жаңа энергия көздерімен жүретін көліктерге арналған сымсыз зарядтау жүйесін әзірледі. Оның энергияны түрлендіру тиімділігі 98,51 пайызға жетті. Бұл технология электромобильдер мен жүргізушісіз көліктерді толық автоматтандырылған зарядтау жүйесін жаппай енгізуге жол ашуы мүмкін.
Қуаты 20 киловатт болатын жүйені Қытай ғылым академиясының Дунгуань материалтану және технологиялар институтының мамандары Сянган қалалық университеті, Кембридж университеті және Қытай ғылым академиясының Физика институтымен бірлесіп әзірледі. Жаңа технологияның негізінде тиімділігі жоғары нанокристалды қорытпалар жатыр. Зерттеу нәтижелері Nature Communications журналында жарияланды.
Жаңа әзірлеменің басты артықшылықтарының бірі — аса жұқа магниттік өзекше. Оның қалыңдығы небәрі 4 миллиметр, бұл дәстүрлі ферриттік шешімдермен салыстырғанда шамамен екі есе жұқа. Сонымен қатар мұндай құрылым жоғары меншікті қуатқа және сымсыз зарядтау кезінде пайда болатын жоғары температураның ұзақ уақыт әсеріне төтеп бере алады.
Бұл технология автономды көлік үшін ерекше перспективалы, өйткені энергия қорын толықтыру үдерісін адамның кабель жалғауынсыз толығымен автоматтандыруға мүмкіндік береді. Әзірлеушілер оны теміржол көлігінде, өнеркәсіптік автоматтандырылған көлік құралдарында және төмен биіктіктегі авиацияда қолдану мүмкіндігін де қарастыруда.
Қазір мамандар жүйені оңтайландыру жұмыстарын жалғастырып, әзірлемені өнеркәсіптік қолданысқа енгізуге дайындап жатыр. Бұл технологияның дамуы Қытайдың интеллектуалды көлік нарығын кеңейту жоспарларымен үндеседі: қабылданған бесжылдық жоспарға сәйкес, 2030 жылға қарай автономды жүргізу функциялары бар автомобильдер елде кеңінен таралуы тиіс.
