Қытай Халық Республикасының құрылған күні мен Күз ортасы мерекесіне орай ұзаққа созылған демалыс Қытайдың туристік нарығына қосымша серпін берді. Саяхатшылар алыс бағыттарды жиі таңдап, бір сапар барысында бірнеше қалаға барып, жаңа әсерлер мен демалыстың ерекше түрлеріне көбірек көңіл бөле бастады.
Биыл Күз ортасы мерекесіне берілген үш күндік демалыс пен Қытай Халық Республикасының құрылған күніне орай жеті күндік демалыстың арасында үш жұмыс күні болды. Осы күндерді жыл сайынғы еңбек демалысына қосқан көптеген қытайлық 13 күн қатарынан демалу мүмкіндігіне ие болды. Trip.com Group мәліметінше, саяхатшылардың шамамен әрбір оныншысы осындай нұсқаны таңдаған.
Ұзағырақ демалыс сапарлар географиясын едәуір кеңейтті. Qunar платформасының деректеріне сәйкес, туристердің 30 пайызға жуығы кемінде екі қалада қонақүй брондаған, ал төрт және одан да көп қаладағы қонақүйлерді брондау саны өткен жылмен салыстырғанда 53 пайызға өсті. Meituan платформасында ұзақтығы 2 мың шақырымнан асатын әуе сапарларына сұраныс 76 пайызға артты.
Туристік белсенділіктің жоғары болуы теміржол тасымалына да әсер етті. 1 қазанда, Қытай Халық Республикасының құрылған күніне орай бір апталық демалыстың алғашқы күнінде теміржолдағы жолаушылар ағыны рекордтық 25,204 миллион адам-сапарға жетті.
Саяхатшылардың талғамы да өзгеріп келеді. Туристер қысқа уақыт ішінде мүмкіндігінше көп көрікті жерді аралап шығуға ұмтылудың орнына жаңа әсер алуға және барған жерімен тереңірек танысуға мүмкіндік беретін бағдарламаларды жиі таңдай бастады.
Мәселен, 1 қазанда Fliggy платформасында ішкі туризм нысандарына кіру билеттерін брондау саны өткен жылдың сәйкес кезеңімен салыстырғанда шамамен 30 пайызға, ал табиғи ландшафттар мен ауылдық жерлерге байланысты туристік өнімдерге сұраныс 50 пайызға жуық өсті. Qunar платформасында «иммерсивті қойылымдар», «отшашу шоулары» және «түнгі экскурсиялар» тақырыптары бойынша іздеу сұраныстарының саны 50 пайыздан астам артты.
Сарапшылардың пікірінше, Қытайдың туристік нарығы ең қысқа мерзімде барынша көп нысанды аралауға бағытталған модельден біртіндеп тереңірек әрі сан алуан әсер алуға негізделген саяхат форматына көшіп келеді. Ұзақ демалыс бұл үрдісті күшейтіп, сонымен қатар қонақүйлерге, мейрамханаларға, көлік қызметтеріне және ойын-сауық индустриясына деген сұранысты арттыруда.
