Хайнань туристерге дәстүрлі жағажайлар мен тропикалық курорттардан бөлек демалыстың сан алуан түрлерін ұсынып келеді. Duty Free дүкендеріндегі сауда, тарихи аудандар, жергілікті тағамдар және балықшылар қауымының тұрмыс-тіршілігімен танысу аралдағы туристік бағдарламаның маңызды бөлігіне айналуда.
Қытай Халық Республикасының құрылған күніне орай демалыс кезінде Саньядағы Duty Free халықаралық сауда кешеніне келушілер саны айтарлықтай артты. Өткен жылдың қарашасында бажсыз сауда саясаты оңтайландырылғаннан кейін мұнда шетелдік туристердің саны едәуір көбейді. Бажсыз сауда Қытайдың әр өңірінен келетін саяхатшылар арасында да жоғары сұранысқа ие.
Алайда Хайнаньның туристік тартымдылығы енді ірі курорттар мен сауда орталықтарымен ғана шектелмейді. Хайкоуда ғасырлық ғимараттары, тар көшелері, дәстүрлі шайханалары мен жергілікті тағамдары бар тарихи Цилоу ауданы танымал. Туристер мұнда ең алдымен ескі қаланың ерекше атмосферасын сезіну және арал тұрғындарының күнделікті өмірімен танысу үшін келеді.
Линшуй-Ли автономиялық уезіндегі Синьцунь порты демалыстың тағы бір ерекше түрін ұсынады. Мұнда жүздеген балық аулау салдары өзіндік «теңіздегі ауылды» қалыптастырған. Қонақтар теңізге балық аулауға шығып, қалқымалы платформаларда жаңа ауланған теңіз өнімдерінен дәм татып, кешке жергілікті түнгі базарға бара алады.
Саньядағы Сидао аралында 400 жылдан астам тарихы бар балықшылар ауылы сақталған. Оның ирелеңдеген көшелері мен дәстүрлі тұрмыс салты да Хайнаньның туристік ұсынысының бір бөлігіне айналып келеді.
Туризмнің жаңа форматтарын дамыту Қытайдың сапалы туристік қызметтер ұсынысын кеңейту стратегиясына сәйкес келеді. 2035 жылға қарай ел Хайнаньды әлемге әйгілі туристік және тұтынушылық бағытқа айналдыруды жоспарлап отыр.
