30 қыркүйек пен 1 қазан аралығында АҚШ-тың Милуоки қаласында өткен «Үлкен жиырмалық» (G20) елдерінің сауда министрлері кездесуінде азық-түлік қауіпсіздігі жөніндегі бірлескен мәлімдеме келісілді. Алайда басқа негізгі мәселелер бойынша ортақ келісімге қол жеткізілген жоқ, деп хабарлады Қытай Халық Республикасының Сауда министрлігі.
G20-ға төрағалық етуші АҚШ ұсынған кездесу күн тәртібіне азық-түлікті қысым көрсету құралы ретінде пайдалану, артық өндірістік қуаттар, мәжбүрлі еңбек және халықаралық саудадағы ең қолайлы жағдай жасау режимі қағидатын қайта қарау мәселелері енгізілді.
Қатысушылар азық-түлікті қару ретінде пайдалануды айыптайтын мәлімдеме қабылдады. Бұл ретте Қытай мен бірқатар дамушы ел жаһандық жеткізу тізбектерінің тұрақтылығын сақтау және мемлекеттердің өз азық-түлік қауіпсіздігін қамтамасыз ету құқығын қорғау қажеттігін атап өтті.
Артық өндірістік қуаттар мен мәжбүрлі еңбек мәселелерін талқылау барысында келіспеушіліктер туындағандықтан, бұл бағыттар бойынша қорытынды құжаттар қабылданбады. Сонымен қатар АҚШ пен G20-ға мүше тағы екі ел бірлестік аясынан тыс мәжбүрлі еңбек мәселесі жөнінде жеке мәлімдеме дайындады.
Ең қолайлы жағдай жасау режиміне қатысты Қытай ведомствосының мәліметінше, қатысушылардың басым бөлігі бұл қағидатты көпжақты сауда жүйесінің негізі ретінде сақтауды қолдады.
Қытай серіктестерімен диалогты жалғастыруға және 2026 жылғы желтоқсанға жоспарланған G20 көшбасшыларының саммитіне дейін келісілген шешімдер әзірлеуге жәрдемдесуге дайын екенін растады.
