Қытай Шанхай ынтымақтастық ұйымы (ШЫҰ) аясында қауіпсіздік, сауда және көлік салаларындағы ынтымақтастықты кеңейтуді қолдады. Бұл туралы ҚХР Мемлекеттік кеңесінің премьері Ли Цян Душанбеде өткен ШЫҰ-ға мүше мемлекеттердің Үкімет басшылары кеңесінің 25-отырысында мәлімдеді.
Бейжің ШЫҰ-ның қауіпсіздік саласындағы төрт орталығының жұмыс істеу ережелерін бірлесіп әзірлеуді жеделдетуді, сондай-ақ халықаралық көлік дәліздерін дамытуға және өндірістік әрі логистикалық тізбектерді нығайтуға жәрдемдесуді көздеп отыр.
Экономикалық салада Қытай қатысушы елдердің бірін-бірі толықтыратын артықшылықтарын пайдалана отырып, сауданы, инвестицияларды және өнеркәсіптік ынтымақтастықты жандандыруды ұсынды. Ли Цян сондай-ақ Қытайдың ШЫҰ мемлекеттерінен келген 1000 медицина қызметкерін оқыту мен олардың біліктілігін арттыруды қаржыландыруға дайын екенін жариялады.
Қытай үкіметінің басшысы халықаралық тұрақсыздық күшейіп отырған жағдайда көпжақты өзара іс-қимылды нығайтудың қажеттігін атап өтті. Оның айтуынша, ұйым өңірлік қауіпсіздікті қамтамасыз етуге және жаһандық дамуға белсендірек атсалысуы тиіс.
Отырыс қорытындысы бойынша үкімет басшылары бірлескен коммюникеге қол қойып, сауда, инвестициялар, өнеркәсіп және көлік байланыстарын дамыту салаларындағы ынтымақтастық туралы құжаттарды мақұлдады.
