Қытайдың тұтыну нарығы қызмет көрсету саласы мен «ақылды» тауарлардың арқасында өсудің жаңа серпініне ие болуда. Бұл елдің ішкі сұранысты нығайтуға ұмтылысы аясында тұтыну шығындары құрылымының өзгеріп жатқанын көрсетеді.
ҚХР Коммерция министрлігінің хабарлауынша, тұтыну Қытай экономикасы өсімінің негізгі қозғаушы күші болып қала береді. 2026 жылдың алғашқы үш тоқсанының қорытындысы бойынша оның экономикалық өсімге қосқан үлесі 46,7 пайызды құрады. Бұл бірінші жартыжылдықтағы көрсеткіштен 0,7 пайыздық тармаққа жоғары.
Қызметтерді тұтынудың өсуін ерекше атап өткен жөн. Қарастырылып отырған кезеңде қызметтердің бөлшек сауда көлемі жылдық есеппен 5 пайызға ұлғайып, тауарлардың бөлшек саудасындағы өсім қарқынынан 4 пайыздық тармаққа асып түсті. Бұл Қытайдағы тұтыну құрылымының өзгеруі жалғасып жатқанын айғақтайды.
Жоғары технологиялық тауарлар да сұраныс өсімінің тағы бір көзіне айналды. Алғашқы тоғыз айда министрлік бақылау жүргізетін негізгі сауда алаңдарында «ақылды» көзілдіріктердің сатылымы ақшалай мәнде өткен жылдың сәйкес кезеңімен салыстырғанда 110 пайызға өсті. Ал қозғалысқа көмектесетін экзоскелеттер мен жасанды интеллектіге негізделген роботтардың (физикалық ортада әрекет ететін интеллектуалды роботтардың) сатылымы тиісінше 46,4 және 22,6 пайызға артты.
Guotai Haitong Securities компаниясының талдамалық есебінде жасанды интеллектіге (ЖИ) негізделген көзілдіріктер сегменті бастапқы тәжірибелер кезеңінен жаппай қолданысқа енгізу кезеңіне өтіп жатқаны, ал саланың өзі қарқынды өсу сатысына аяқ басқаны атап өтілген.
Экологиялық таза тауарлар мен денсаулықты сақтауға арналған өнімдерге сұраныс та артып келеді. Министрлік қадағалайтын негізгі платформаларда органикалық азық-түлік өнімдерінің сатылымы жылдық есеппен 6,4 пайызға өсті. Ал қыркүйек айында жаңа энергия көздерімен жүретін жеңіл автомобильдердің жалпы бөлшек сауда көлеміндегі үлесі 67 пайызға жетті.
Бұл үрдістер Қытайдың тұтынуды ынталандыру жөніндегі күш-жігерін жандандырып, технологиялық инновацияларды тұтынушылық сұраныспен тығыз байланыстыруы аясында қалыптасып отыр. Ел сауда саласына жасанды интеллект пен басқа да озық технологияларды енгізуге бағытталған жаңа басшылық қағидаттарды жариялады. Бұл шаралар тұтынушылық сұранысты кеңейтуге, дәстүрлі бизнес үлгілерін жаңғыртуға және тауарларды тарату тиімділігін арттыруға арналған.
Қытайда жасанды интеллект индустриясы қарқынды дамып келеді. Жасанды интеллектіні қолдайтын смартфондар, желіге қосылған «ақылды» автомобильдер мен адамға ұқсас роботтар барған сайын кеңінен қолданылуда.
