2025 жылдың соңына қарай Қытай кәсіпорындары шетелдегі экологиялық таза өндіріс жобаларына кемінде 227 млрд доллар инвестиция салу жөнінде міндеттеме алды. Бұл туралы ҚХР Экология және қоршаған орта министрі Хуан Жуньцю Гонконгта өткен «Бір белдеу, бір жол» бастамасы аясындағы жасыл инновациялар — 2026» конференциясында мәлімдеді.
Конференцияға 20-дан астам елден шамамен 300 қатысушы жиналды. Негізгі назар экологиялық технологиялар, инвестициялар және орнықты даму салаларында Жаһандық Оңтүстік елдерімен ынтымақтастықты дамытуға аударылды.
Хуан Жуньцюдің айтуынша, Қытай 50-ден астам мемлекетпен экология және климат саласындағы ынтымақтастық туралы 80-нен астам құжатқа қол қойған.
Өзбекстан президентінің экология мәселелері жөніндегі кеңесшісі Азиз Абдухакимов елінің шөлейттенуге қарсы күрестің қытайлық технологияларына, қорғаныш орман екпелерін құруға және өнеркәсіпті экологиялық жаңғыртуға мүдделі екенін атап өтті.
БҰҰ Бас хатшысының арнайы кеңесшісі Селвин Харт «Бір белдеу, бір жол» бастамасының мүмкіндіктерін таза энергетика мен инфрақұрылымды дамыту және Жаһандық Оңтүстік елдеріне қаржы тарту үшін пайдалануға шақырды.
Конференцияда сондай-ақ осы мемлекеттердің экологиялық даму перспективалары туралы баяндама ұсынылып, климаттың өзгеруіне уақтылы бейімделудің маңыздылығы атап өтілді.
Қазіргі уақытта «Бір белдеу, бір жол» бастамасы аясындағы жасыл даму жөніндегі халықаралық коалиция 64 қатысушыны және 50-ге жуық елден 190-нан астам қытайлық әрі шетелдік серіктесті біріктіреді.
Конференцияны ҚХР Экология және қоршаған орта министрлігі мен Гонконгтың қоршаған ортаны қорғау ведомстволары ұйымдастырды.
