Шанхайда 5–10 қараша аралығында өтіп жатқан 9-шы Қытай халықаралық импорт тауарлары көрмесіне (CIIE) 4100-ден астам шетелдік компания қатысуда. Әлемнің ірі өндірушілері жаңа технологиялық әзірлемелерін таныстырып, Қытаймен ынтымақтастықты кеңейту жоспарларын жариялауда.
Биыл көрмеге 4142 компания қатысып отыр. Олардың қатарында Fortune Global 500 тізіміне енген 300-ден астам компания мен түрлі салалардың жетекші кәсіпорындары бар. Канада мен Шри-Ланка құрметті қонақ мәртебесіне ие болды. Аумағы 440 мың шаршы метрді құрайтын көрмеде 6G байланыс технологиялары, жоғары дәлдіктегі өнеркәсіптік жабдықтар, инновациялық материалдар, сондай-ақ тұтыну тауарларының кең ассортименті ұсынылған.
Францияның Michelin компаниясы құрамының 75 пайызы жаңартылатын және қайта өңделген материалдардан тұратын автокөлік шинасын таныстырды. Michelin China компаниясының вице-президенті Джей Ву Қытайдың жаңа технологияларды, соның ішінде электрмобильдер мен автономды жүргізу жүйелерін сынақтан өткізетін маңызды алаңға айналып келе жатқанын атап өтті.
Компания Қытайдағы инновациялық жобаларға қатысу аясын кеңейтіп, «Қытайда - Қытай үшін» стратегиясынан «Қытаймен бірге - бүкіл әлем үшін» қағидатына көшуде.
Басқа да халықаралық корпорациялар Қытаймен ынтымақтастықты одан әрі дамытуға мүдделі екенін білдірді.
Estée Lauder компаниясының басшысы Стефан де Ла Фавери Қытайды әлемдік сұлулық индустриясы үшін инновациялар мен жаңа идеялардың маңызды көзі деп атады.
Novo Nordisk компаниясының президенті әрі бас директоры Мазиар Майк Дустдар жаңа дәрілік препараттарды жасау үшін Қытайдағы келешегі зор фармацевтикалық әзірлемелерді пайдалануға ниетті екенін мәлімдеді.
«Қытайға инвестиция салу - болашаққа инвестиция салу деген сөз», — деп атап өтті ол.
CIIE көрмесі Гуанчжоудағы Кантон жәрмеңкесі аяқталғаннан кейін бірден ашылды. Бірінен кейін бірі өткен осы екі ірі сауда іс-шарасы Қытайдың экспорттық мүмкіндіктерін және шетелдік өндірушілердің Қытай нарығына шығу келешегін көрсетті.
