Гуандун провинциясын, Гонконг пен Макаоны біріктіретін Қытайдың «Үлкен шығанақ» аймағы төмен көміртекті технологиялар мен климаттық инновацияларды табысты енгізудің үлгілерінің біріне айналып келеді. Бұл туралы БҰҰ-ның Климаттың өзгеруі туралы негіздемелік конвенциясы хатшылығының өкілі Стелиос Песмаджоглу Түркияда өтіп жатқан COP31 конференциясында мәлімдеді.
Қытай павильонында ұйымдастырылған арнайы іс-шарада сөз сөйлеген сарапшы аймақтың жасыл дамуға деген көзқарасын болашақты болжай білетін әрі өзгелерге үлгі болатын тәсіл деп бағалады. Ол Гуандун провинциясының көміртегі шығарындыларына арналған квоталар саудасын дамыту, кәсіпорындардың көміртегі ізін басқару және климаттық жобаларға инвестиция тарту тәжірибесіне ерекше назар аударды.
Песмаджоглудың айтуынша, «Үлкен шығанақ» аймағында қалалардың климаттың өзгеруіне төзімділігін арттыруға бағытталған шешімдер белсенді енгізілуде. Олардың қатарында экологиялық инфрақұрылымды дамыту, табиғи бейімделу тетіктерін пайдалану және өңіраралық өзара іс-қимылды жетілдіру бар.
Сарапшы технологиялық әзірлемелерді, қаржы құралдарын және басқарудың жаңа тәсілдерін ұштастыру аймаққа басқа елдерде де қолдануға болатын климаттық шешімдер жасауға мүмкіндік беретінін атап өтті. Ол бұл үлгіні институционалдық және технологиялық инновацияларды біріктіруге негізделген «Үлкен шығанақ жолы» деп сипаттады.
Песмаджоглу Қытайдың осы аймағы өз тәжірибесі мен әзірлемелерін алдағы уақытта да басқа елдермен бөлісіп, әлемдік экономиканың төмен көміртекті даму үлгісіне көшуіне ықпал етеді деген үмітін білдірді. БҰҰ-ның Климаттың өзгеруі жөніндегі 31-ші конференциясы (COP31) 9–20 қараша аралығында Антальяда өтуде. Оған 200-ге жуық ел мен өңірдің өкілдері қатысуда. Келіссөздердің басты тақырыбы — климат саласындағы міндеттемелерден парниктік газдар шығарындыларын азайту және климаттың өзгеруіне бейімделу жөніндегі нақты шараларға көшу.
