Қытай мен Түркия жасыл энергетика, төмен көміртекті технологиялар және көлік инфрақұрылымы салаларындағы ынтымақтастықты жандандыруды көздеп отыр. Бірлескен жобалардың келешегі Ыстанбұлда өткен жасыл даму жөніндегі Қытай-Түркия іскерлік форумында талқыланды.
Іс-шараға екі елдің мемлекеттік құрылымдары мен іскерлік орта өкілдерінен шамамен 300 адам қатысты. Форумды Қытайдың халықаралық сауданы дамытуға жәрдемдесу комитеті (CCPIT) мен Түркияның сыртқы экономикалық байланыстар кеңесі (DEİK) ұйымдастырды.
CCPIT төрағасы Жэнь Хунбинь Қытай мен Түркия арасындағы сауда-экономикалық қатынастардың тұрақты дамып келе жатқанын атап өтіп, жасыл экономиканы екіжақты ынтымақтастықтың ең келешекті бағыттарының бірі деп атады.
Оның айтуынша, Қытай тарапы іскерлік байланыстарды кеңейтуге, бірлескен жобаларды жүзеге асыруға және екі ел кәсіпорындары арасындағы әріптестікті нығайтуға жәрдемдесуге дайын.
Түркияның вице-президенті Джевдет Йылмаз Анкараның қытайлық инвестицияларды, әсіресе экономиканы экологиялық тұрғыдан жаңғыртуға бағытталған жобаларға тартуға мүдделі екенін атап өтті. Ол сондай-ақ 2026 жылы Қытай мен Түркия арасында дипломатиялық қатынастар орнағанына 55 жыл толатынын еске салды.
Форум қатысушылары халықаралық көлік бағыттарын дамыту мәселесіне де ерекше назар аударды. Түркия тарапы «Орта дәліз» бастамасын Қытайдың «Бір белдеу, бір жол» бастамасымен ұштастыруға дайын екенін білдірді.
Джевдет Йылмаздың пікірінше, мұндай өзара іс-қимыл көлік байланыстарын нығайтып, сауда мен инвестициялар үшін қосымша мүмкіндіктер жасауға жол ашады.
Форум барысында іскерлік орта өкілдері жаңартылатын энергетика, төмен көміртекті өндірістік тізбектерді қалыптастыру және логистикалық орталықтарды дамыту салаларындағы ынтымақтастықты талқылады.
Іс-шара іскерлік кездесулермен аяқталды. Олардың барысында қытайлық және түркиялық компаниялар бірлескен жобаларды жүзеге асыру мүмкіндіктерін қарастырды.
