Пәкістандық ғарышкер алғаш рет Қытайдың адам қатысатын ғарыш миссиясына қатысады. Ол «Шэньчжоу-24» ғарыш кемесінің экипажына пайдалы жүктеме жөніндегі маман ретінде қосылып, орбитаға қысқа мерзімді ұшу сапарын жасайды.
ҚХР Сыртқы істер министрлігінің ресми өкілі Го Цзякуньнің хабарлауынша, бағдарлама аяқталғаннан кейін миссияға қатысатын пәкістандық ғарышкер «Шэньчжоу-23» кемесімен Жерге оралады.
Бұл Қытайдың ұлттық адам қатысатын ғарыш бағдарламасы аясында шетелдік ғарышкердің қытайлық экипажбен бірге ғарышқа алғаш рет ұшуы болмақ.
Го Цзякунь Қытайдың ғарыш кеңістігін бейбіт мақсатта пайдалануды және оны зерттеу саласындағы халықаралық ынтымақтастықты кеңейтуді қолдайтынын атап өтті.
Дипломаттың айтуынша, алдағы миссия Қытай мен Пәкістан арасындағы ынтымақтастықтың жаңа кезеңіне айналады. 2026 жылы екі ел дипломатиялық қатынастардың орнағанына 75 жыл толуын атап өтуде.
Бейжің Исламабадпен ғарыш саласындағы ынтымақтастықты одан әрі дамытуды, сондай-ақ басқа бағыттар бойынша өзара іс-қимылды кеңейтуді көздеп отыр.
ҚХР Сыртқы істер министрлігінің өкілі ғарышты зерттеу бүкіл адамзаттың ортақ мүдделеріне сай келетінін атап өтіп, Қытайдың ғарыш кеңістігін бейбіт мақсатта игеруге бағытталған халықаралық жобаларға қатысуға дайын екенін растады.
