«Бір белдеу, бір жол» бастамасын зерттеу жөніндегі халықаралық желінің (BRSN) құрамындағы ұйымдар саны 150-ге жетті. Жаңа қатысушылар қатарында Қырғызстан, Өзбекстан және Қытайдың талдау және ғылыми мекемелері, сондай-ақ БРИКС халықаралық форумы бар.
Желіні кеңейту туралы шешім Қытайдың Шэньси провинциясының әкімшілік орталығы Сиань қаласында өткен BRSN бастамашылары кеңесінің отырысында жарияланды.
Бірлестікке Қырғызстанның «Манас» ұлттық академиясы, Өзбекстанның Даму стратегиясы орталығы, Сиань көлік университеті және БРИКС халықаралық форумы қосылды.
Кездесуге қатысушылар желінің атқарған жұмыстарының нәтижелерін және әртүрлі елдердің талдау орталықтары арасындағы өзара іс-қимылды одан әрі дамыту мүмкіндіктерін талқылады.
Бірлескен зерттеулер аясын кеңейтуге, сараптамалық тәжірибе алмасуға және «Бір белдеу, бір жол» бастамасы шеңберіндегі халықаралық ынтымақтастықты дамытуға бағытталған талдамалық материалдар әзірлеуге ерекше назар аударылды.
Отырыс «Синьхуа» ақпарат агенттігі бас редакторының орынбасары, BRSN кеңесі төрағасының орынбасары Жэнь Вэйдунның төрағалығымен өтті.
«Бір белдеу, бір жол» бастамасын зерттеу жөніндегі халықаралық желі 2019 жылдың сәуір айында «Синьхуа» агенттігінің бастамасымен 15 талдау орталығының бірлескен қатысуы арқылы құрылған болатын.
Бүгінде бірлестік 150 ұйымды қамтиды және бастамаға қатысушы елдер арасындағы ынтымақтастықты дамыту жөнінде сараптамалық пікір алмасуға, ғылыми зерттеулер жүргізуге және ұсыныстармен бөлісуге арналған халықаралық алаң қызметін атқарады.
