«Бір белдеу, бір жол» бастамасы аясындағы халықаралық талдау орталықтары желісінің қатысушылары 150-ге жетті. Оған Үндістан, Қытай, Қырғызстан және Өзбекстаннан төрт жаңа ұйым қосылды.
Жаңа қатысушылар Қытайдың Шэньси провинциясындағы Сиань қаласында өткен «Бір белдеу, бір жол» талдау орталықтарының ынтымақтастығы жөніндегі халықаралық комитеттің құрылтайшылар кеңесінің отырысында таныстырылды.
Бірлестік құрамына БРИКС халықаралық форумы (Үндістан), Сиань көлік университеті (Қытай), «Манас» ұлттық академиясы (Қырғызстан) және «Даму стратегиясы» орталығы (Өзбекстан) енді.
Отырысқа қатысушылар комитет қызметінің қорытындыларын шығарып, ынтымақтастықты одан әрі дамытудың негізгі бағыттарын талқылады. Ғылыми алмасуларды кеңейтуге, бірлескен зерттеулер жүргізуге және түрлі елдердің талдау орталықтары арасындағы өзара іс-қимылды нығайтуға ерекше назар аударылды.
Ұйым өкілдері желінің «Бір белдеу, бір жол» бастамасын сараптамалық тұрғыдан қолдаудағы рөлін атап өтіп, бірлескен ғылыми-зерттеу жобаларын дамытуға дайын екендерін білдірді.
Отырысты кеңес төрағасының орынбасары, «Синьхуа» ақпарат агенттігі бас редакторының орынбасары Жэнь Вэйдун жүргізді.
«Бір белдеу, бір жол» талдау орталықтарының ынтымақтастығы жөніндегі халықаралық комитет 2019 жылдың сәуір айында «Синьхуа» институты мен тағы 15 талдау орталығының бастамасымен құрылған.
Бүгінде бірлестік «Бір белдеу, бір жол» бастамасы аясында сараптамалық және ғылыми-зерттеу ынтымақтастығына қатысатын 150 ұйымды біріктіреді.
