Қытай мен Иордания туризм саласындағы ынтымақтастықты кеңейтуді көздеп отыр. Осы бағыттағы маңызды қадамдардың бірі - 2027 жылдың қаңтарына жоспарланған екі ел арасындағы тікелей әуе қатынасын іске қосу. Бұл туралы Иорданияның туризм және көне мұралар министрі Имад Хиджазин Амманда өткен Қытайдың Хайнань провинциясының туристік әлеуетін таныстыру шарасында мәлімдеді.
Министрдің айтуынша, 2026 жылдың желтоқсанында Иордания алғаш рет Хайнаньда өтетін Қытай халықаралық туристік жәрмеңкесіне (China International Travel Mart) құрметті қонақ ретінде қатысады. Иордания делегациясын министрдің өзі басқарады, ал делегация мүшелері корольдіктің негізгі туристік көрікті жерлерін таныстырады.
ҚХР-дың Иорданиядағы елшісі Го Вэй Бейжіңнің туристік алмасуларды дамытуға және екіжақты ынтымақтастықты нығайтуға мүдделі екенін атап өтті.
«Жібек жолының жаңғырығы: таулар мен теңіздер арқылы» атты іс-шараға туризм саласының 100-ге жуық өкілі мен басқа да қонақтар қатысты. Оны Аммандағы Қытай мәдени орталығы мен Хайнань провинциясының туризм, мәдениет, радио, телевизия және спорт департаменті ұйымдастырды.
Қатысушыларға Хайнаньның теңіз жағалауындағы курорттары мен серфингке арналған танымал орындарын қоса алғанда, провинцияның он туристік көрікті жері таныстырылды. Иорданиялық туристік агенттіктердің өкілдері де Қытай провинциясына жасаған сапарларынан алған әсерлерімен бөлісті.
Туристік ынтымақтастықты кеңейту Қытай мен Иордания арасындағы дипломатиялық қатынастардың орнағанына 50 жыл толуымен ұштастырылып отыр. Екі ел бұл мерейтойды 2027 жылы атап өтеді.
