«Франциядағы қазақстандық күз» мәдени маусымы қазақ киносының 5-ші фестивалімен аяқталды, деп хабарлайды DKNews.kz.
Париж қаласының «Forum des images» мәдениет және кинематография орталығында 2023 ж. 29 қараша мен 2 желтоқсан аралығында Франциядағы Қазақстан Елшілігінің жыл сайынғы «Франциядағы қазақстандық күзі» мәдени маусымының аясында 5-ші қазақстандық кинофестивалі өтті.
«Қыз Жібек» көркем фильмі фестивальдің ашылу салтанатында көрсетіліп, 200-ден астам көрермендерін қазақ халқының бай мәдениеті мен ұрпақтан ұрпаққа мирас болып келе жатқан салт-дәстүрлерімен таныстырды.Қазақстан Республикасының еңбек сіңірген әртісі, Ғабит Мүсіреповтың эпосына түсірілген аты аңызға айналған «Қыз Жібек» фильмінде басты рөл орындаған Меруерт Үтекешева кинофестивальге құрметті қонақ ретінде қатысты.
Француз тарапынан Везуль қаласында өтетін Халықаралық Азия кинофестивалінің басшылары Жан-Марк пен Мартин Тируан және әйгілі француз актері Сами Насери кинофестивальдің құрметті қонақтары ретінде қатысты. Құттықтау сөздерінде француз тұлғалары қазақстандық кинематографтың белсенді дамуын, оның беделі мен халықаралық танылуының өсуін атап өтіп, фестивальге одан әрі табысты жалғасуын тіледі.
А.ж. 2 желтоқсанға дейін жалғасқан фестиваль аясында бірлескен кино өндірісі саласындағы әріптестік қатынастарды нығайтуға бағытталған Қазақстан мен Франция кино мамандарының қатысуымен бизнес-алаң ұйымдастырылды, сондай-ақ екі елдің киномектептері арасында іскерлік кездесулер өтті.
Сонымен қатар, 2 желтоқсанда Қазақстан Елшілігінің ғимаратында фестиваль аясында ҚР еңбек сіңірген спорт шебері Денис Теннің сценарийі бойынша түсірілген «Соқыр махаббат» романтикалық драмасының көрсетілімі өтті.
Қазақ кинофестивалі сол күні аты аңызға айналған қазақ вокалдық-аспаптық ансамблінің тарихы туралы «Дос-Мұқасан» фильмімен аяқталды.
