Қазақстан Республикасы Өнеркәсіп және құрылыс министрі Қанат Шарлапаев Сауд Арабиясының Эр-Рияд қаласында өткен «The Future Mineral Forum» министрлерінің «Дөңгелек үстеліне» қатысты, деп хабарлайды DKNews.kz.
Іс-шара әлемнің түкпір-түкпірінен 80-нен астам жоғары деңгейлі министрлердің басын қосты. Аталмыш шара тау-кен өндірісінің қазіргі тенденцияларын ғана емес, сонымен қатар әлемдік қауымдастық эволюциясында шешуші рөл атқаратын перспективаларды талқылау алаңына айналды. Тәжірибе мен көзқарас алмасудың бірегей мүмкіндігі энергетикалық және экономикалық секторларды табысты дамыту үшін жаһандық ынтымақтастықтың маңыздылығын атап өтіп, жер қойнауын пайдалануды дамыту саласында жаңа көкжиектер ашады.
Әлемдік қауымдастық Қазақстанды жаһандық нарықта сыни минералдарды ұсынатын стратегиялық маңызды өңір ретінде қабылдайды.
Алюминий, мыс, хром, фосфор және титанды қоса алғанда, елдің экспорттық өнімдері әлемдік нарықта маңызды орын алады. Еуропалық Одақ бөлген сыни шикізат минералдарының 34 түрінің 19-ы Қазақстанда өндіріледі, ал қалған 14 түрі бойынша шикізат базасы қалыптасқан.
Никель, кобальт, марганец және литий сияқты аккумуляторлық материалдар кластерін дамытуға ерекше назар аударылады. Бұл Қазақстан әлемдік қоғамдастық үшін сыни металдардың жетекші жеткізушісі болуға ұмтылатын «жасыл энергетикалық ауысудың» жаһандық трендтеріне сәйкес келеді.
Қазақстан өзінің белсенді декарбонизация саясаты шеңберінде көмірқышқыл газы шығарындыларын азайтуға және энергия үнемдеу мен энергия тиімділігін арттыру үшін инновациялық технологияларды енгізуге назар аударады.
Біздің ел геологиялық зерттеулерді қаржыландыратын инвесторларды жер қойнауын пайдалануға басым құқық бере отырып және жеңілдетілген рәсімдерді, жобаларды іске асырудың қысқартылған мерзімдерін қамтамасыз ете отырып шақырады. ESG қағидаттарына сәйкес өндірістік қуаттардың технологиялық және экологиялық тиімділігін арттырудың маңыздылығына ерекше назар аударылады.
