Африка, Кариб және Тынық мұхит мемлекеттерінің ұйымы Қазақстанмен ынтымақтастыққа мүдделі, деп хабарлайды DKNews.kz.
Қазақстанның Бельгиядағы Елшісі Марғұлан Баймұхан Африка, Кариб және Тынық мұхит мемлекеттері ұйымының (АКТ) Бас хатшысы Джордж Ребело Пинто Чикотимен кездесті.
Кездесу барысында дипломаттар Қазақстан мен АКТ арасындағы ынтымақтастықты кеңейту перспективаларын атап өтті.
Бас хатшы АКТ-ның Еуропалық Одақпен ынтымақтастық тәжірибесі туралы айтты.
Сонымен қатар, АКТ-ға мүше елдерінің Қазақстанмен сауда, ауыл шаруашылығы өнімдерін экспорттау, жоғары білім, мәдениет және спорт саласындағы кооперациясының мүмкіндіктері қарастырылды.
Тараптар сондай-ақ Қазақстан-Еуропа жолындағы басымдықтарды, сондай-ақ Орталық Азия елдерінің Еуропалық Одақ институттарымен ынтымақтастығын талқылады.
Өз кезегінде, АКТ Бас хатшысы Қазақстанның халықаралық аренадағы, өңірлік контекстегі, қауіпсіздік мәселелеріндегі белсенді рөлін атап өтіп, ынтымақтастықты одан әрі тереңдетуге дайындығын растады.
Бас хатшысы Қазақстан өңірлеріндегі су тасқынына байланысты қолдау білдіріп, жанашырлық білдірді.
Қазақ дипломаты Д. Ребелоны 2024 жылғы 13-14 маусымға жоспарланған алдағы Астана халықаралық форумына қатысуға шақырды.
Африка, Кариб теңізі және Тынық мұхит мемлекеттерінің ұйымы 1975 жылда құрылды. Ұйымның Хатшылығы Брюссель қаласында орналасқан. Ұйымның негізгі мақсаттарының бірі – АКТ пен ЕО елдері арасындағы экономикалық байланыстарды үйлестіру. Бүгінгі таңда АКТ құрамына 79 мемлекет кіреді.
