Мыңдаған заңсыз жазу өшірілді. Алматыда жастар мен құқық қорғау органдарының бірлескен жұмысы нәтижесінде есірткі жарнамасы бар 7,5 мыңға жуық граффити жойылып, 360-тан астам интернет-ресурс бұғаттауға жолданған, деп хабарлайды DKNews.kz.
Кезекті «Есірткісіз Қазақстан» акциясы «Заң мен тәртіп» қағидаты аясында өтті. Оны Алматы қаласының Жастар саясаты басқармасы қалалық Полиция департаментімен бірлесіп ұйымдастырды.
Бір акцияда 120-дан астам есірткі жарнамасы жойылды
Акцияға 200-ге жуық адам қатысты. Олардың арасында жас белсенділер, «Әділет жастар одағы» жастар қозғалысының өкілдері, «Esirtkisiz Almaty» профилактикалық фронт-кеңсесінің белсенділері, еріктілер, жастар комьюнити орталықтарының резиденттері, полиция қызметкерлері, әкімдік пен прокуратура өкілдері болды.
Қатысушылар бірнеше топқа бөлініп, аулаларды, қоғамдық орындарды және қаланың басқа аумақтарын аралады.
Негізгі назар есірткінің заңсыз айналымына қатысты жарнамаға, соның ішінде интернеттегі есірткі саудасына бағыттайтын жазулар мен граффитилерге аударылды.
Нәтижесінде:
- есірткі жарнамасы бар 120-дан астам жазу анықталып, боялып жойылды;
- күмәнді интернет-ресурстар туралы мәліметтер тексеру үшін құзырлы органдарға жіберілді;
- акцияға 200-ге жуық адам қатысты.
«Мұндай жазулардың артында нақты қауіп тұр»
Алматы қаласы Полиция департаменті Есірткі қылмысына қарсы іс-қимыл басқармасының аса маңызды істер жөніндегі аға жедел уәкілі Дәурен Көбеев мұндай жазуларды қаланың сыртқы келбетіне қатысты мәселе ретінде ғана қабылдамау керегін айтты.
«Мұндай жазулар – қаланың сыртқы келбетін бұзатын жай ғана көрініс емес. Оның артында, әсіресе жастар үшін, нақты қауіп тұр. Сондықтан бұл мәселеге бей-жай қарамай, жастардың өзін профилактикалық жұмыстарға тарту маңызды. Біздің міндетіміз – мұндай жарнамаларды жоюмен ғана шектелмей, есірткі мен оны таратуға қауіпсіз қалада орын жоқ екенін түсіндіру», – деді Дәурен Көбеев.
Акцияның негізгі мақсаты — жастар арасында есірткі қылмысына төзбеушілікті қалыптастыру, құқықтық мәдениетті арттыру және жас алматылықтарды қалалық ортаның қауіпсіздігіне тікелей араластыру.
Жыл басынан бері 150-ден астам профилактикалық шара өтті
Алматыда «Заң мен тәртіп» қағидаты аясындағы профилактикалық жұмыс жыл бойы жүргізіліп келеді.
Жыл басынан бері жастардың құқықтық сауатын арттыруға және құқық бұзушылықтың алдын алуға бағытталған 150-ден астам іс-шара ұйымдастырылған.
Есірткінің таралуына қарсы бағыттағы «НаркоSTOP» жобасы аясында:
- 110-нан астам іс-шара өткізілді;
- 18 мыңнан астам жас қамтылды.
Акция ұйымдастырушылары жастардың мұндай жұмысқа тікелей қатысуын профилактиканың маңызды бөлігі ретінде қарастырады.
«Біз үшін жастардың сырттай бақылаушы болып қана қалмай, қаладағы өзекті мәселелерді шешуге тікелей атсалысуы маңызды. Бүгін жастар мемлекеттік және құқық қорғау органдарының өкілдерімен бірге көшелерге шығып, есірткі жарнамасына қарсы күреске үлес қосты. Осындай акциялар ауданы мен қаласының қауіпсіздігіне жауапкершілікпен қарауына ықпал етеді», – деді «Әділет жастар одағы» жастар қозғалысының төрағасы Тұрлан Ерболат.
360-тан астам интернет-ресурс бұғаттауға жіберілді
Қаладағы жұмыс көшелердегі жазуларды өшірумен шектелмейді.
Жастар белсенділері мен тиісті қызметтердің бірлескен жұмысының нәтижесінде есірткі жарнамасы бар 7,5 мыңға жуық граффити жойылған.
Бұған қоса, есірткінің заңсыз айналымына қатысы болуы мүмкін 360-тан астам интернет-ресурс анықталып, бұғаттау үшін жолданған.
Алматыда есірткінің заңсыз жарнамасын анықтау және жою жұмыстары жалғасады. Негізгі міндеттердің бірі — жастарды профилактикалық шараларға тартып, қоғамдық кеңістіктегі және интернеттегі заңсыз жарнамаға төзбеушілікті күшейту.
