Люксембургте Қазақстанның Еуропалық инвестициялық банкпен ынтымақтастықты кеңейту талқыланды, деп хабарлайды DKnews.kz.
Қазақстан Республикасының Еуропалық одақ жанындағы Тұрақты өкілі Марғұлан Баймұхан Еуропалық инвестициялық банктің (EIB) вице-президенті Кириакос Какуриспен кездесу өткізді.
Кездесу барысында тараптар Қазақстанның әлеуметтік-экономикалық дамуын ынталандыруға бағытталған инвестициялық жобалар мен бастамаларды қоса алғанда, Қазақстан-Еуропа ынтымақтастығының негізгі бағыттарын талқылады.
Инфрақұрылымды жаңғырту және су қауіпсіздігін жақсарту жөніндегі жобаларды бірлесіп қаржыландыру мәселелеріне ерекше назар аударылды.
М. Баймұхан Транскаспий халықаралық көлік маршрутының сауда қатынастарын арттырудағы және Еуропа мен Азия арасындағы іскерлік байланыстарды жолға қоюдағы өсіп келе жатқан рөлін ерекше атап өтті.
Сонымен қатар Елші жасыл экономика және технологиялар саласындағы ынтымақтастықты кеңейтуге қызығушылық білдірді.
Қазақ дипломаты сондай-ақ сұхбаттасын ҚР Президенті Қасым-Жомарт Тоқаевтың ү.ж. 2 қыркүйектегі Жолдауының негізгі басымдықтары туралы хабардар етіп, Қазақстан басшылығының азаматтардың әл-ауқатын арттыруға бағытталған саяси, экономикалық және әлеуметтік реформаларды жалғастыруға бағытталғандығын атап өтті.
Еуропалық инвестициялық банк (EIB) – тұрақты даму жобаларын қаржыландыруда шешуші рөл атқаратын әлемдегі ең ірі көпжақты қарыз алушы және кредитор. 2023 жылы EIB инвестициялары 95 млрд еуроны құрады, ал банк активтерінің жиынтық портфелі 600 млрд еуроға жетті. Банк инфрақұрылым, инновация, су қауіпсіздігі және энергетика саласындағы жобаларды қолдай отырып, 160-тан астам елде жұмыс істейді.
