Мәжіліс депутаты Еділ Жаңбыршин Премьер-министрге жолдаған депутаттық сауалында ел ішіндегі саяси тұрақтылықты сақтау және сыртқы күштердің ықпалын шектеу мәселесін көтерді, деп хабарлайды DKnews.kz.
Депутат сауалды Мемлекет басшысы Қасым-Жомарт Тоқаевтың Ұлттық Құрылтайда сөйлеген сөзімен бастады. Президент жаһандану дәуірінің әлсіреп, оның орнына мемлекеттік ұлтшылдық пен аймақтық ықпал үшін күрес кезеңінің басталғанын мәлімдеді. Сонымен қатар, еліміздің ішкі саясатына тікелей араласқан шетелдік күштердің әрекетін сынға алып, нақты мін тағып, қоғамды сақтандыру қажеттігін ескертті.
Сыртқы күштердің мақсатты әрекеті
Сауалда геосаясаттағы доминант мемлекеттердің өз мүддесін жүзеге асыру үшін әртүрлі тәсілдерді қолданатыны айтылған. Олардың қатарында әсірефеминистік, ЛГБТ, эмо сияқты субъмәдени қозғалыстар арқылы ұлттық құндылықтарға нұқсан келтіру әрекеттері бар. Бұл қозғалыстар миллиондаған АҚШ долларымен арнайы қаржыландырылып отырғаны көрсетілген.
Сонымен бірге, олар ұлтараздық, діни алауыздық, трайбализм мен сепаратизмді қоздыру арқылы ел ішіндегі саяси күн тәртібіне енуге тырысып жатыр. Бұл туралы Мемлекет басшысы: «Халықаралық үкіметтік емес қорлар мен ұйымдар көптеген елдің ішкі ісіне негізсіз араласты» – деп атап өтті.
USAID және "жұмсақ күш" саясаты
АҚШ Конгресінде USAID – Халықаралық даму агенттігінің жұмысын тоқтату мәселесі талқыланып жатқанына назар аударған депутат, соңғы он жылда аталған ұйым Қазақстанда ішкі саясатқа ықпал ету үшін 150 млн доллардан астам қаржы бөлгенін айтты. Бұл қаржылардың мақсаты – демократиялық құндылықтар желеуімен елдің ішкі тұрақтылығын шайқау.
Гранттар мен өтірік есеп: шындық бұрмалануда
Кейбір үкіметтік емес ұйымдардың шетелдік гранттарға тәуелділігі сынға алынды. Олар елімізде адам құқықтарының бұзылуы, сөз бостандығының шектелуі туралы жалған ақпарат таратып, дамымаған елдермен салыстыру арқылы шетелдік құрылымдардан жаңа қаржы тартуға тырысады. Депутаттың айтуынша, бұл – «гуманитарлық бизнес» арқылы жеке пайда табудың жолы.
Ұлттық мүдде – басымдықта
Президент Тоқаевтың Бурабайда өткен Құрылтайда айтқан: «Біз ұлттық мүддемізді қорғау үшін алдағы уақытта да ұтымды әрі байыпты әрекет етеміз» – деген сөзі депутат сауалында негізгі бағдар ретінде келтірілді. Елдің ішкі саясатына араласуға жол берілмейтінін қатаң ескерткен депутат, Қазақстанда ішкі саясатты жүргізуге жауапты билік институттары бар екенін атап өтті.
Үкіметке ұсынылған нақты қадамдар:
-
Қаржыны бақылау: Қаржы министрлігі мен тиісті мемлекеттік органдар сырттан құйылатын, ішкі саясатқа бағытталған қаржы көздерін анықтап, шара қабылдауы тиіс.
-
Заңнаманы саралау: Шетелден қаржыланатын ұйымдардың қызметін реттейтін заңнамалардың тиімділігіне талдау жүргізілуі керек.
-
Бақылау механизмдерін жетілдіру: Шетелдік гранттар арқылы жүзеге асырылатын жобалардың қызметін қадағалайтын бақылау жүйелері жаңартылуы тиіс.
Инвестиция мен идеологияны шатастырмау қажет
Сырттан келетін қаржы, егер ол таза инвестиция болса, ел экономикасын, экологиясын және денсаулық сақтау саласын жақсартуға бағытталса — мұндай қаржыға есік ашық. Ал ұлттық дүниетанымымызға қайшы, тұрақтылыққа қауіп төндіретін жобаларға – жол жабық.
Жаңа тұжырымдама – жаңа кезең
Тәуелсіздік алғаннан бері алғаш рет елде ішкі саясат Тұжырымдамасы әзірленбек. Бұл құжат ішкі саясаттың құрылымы мен ережелерін нақтылап, ел мүддесін қорғайтын, деструктивті топтарға қарсы тұратын стратегиялық бағдар болады.
