Еуропарламентте Қазақстан Республикасының Бельгиядағы Елшілігі мен Еуропарламенттің Орталық Азия және Моңғолия елдерімен байланыстар жөніндегі делегациясы (DCAS) бірлесіп ұйымдастырған «ЕО–Қазақстан: білім беру мен мәдениет – ынтымақтастықтың берік көпірлері» атты дөңгелек үстел өтті.
Іс-шараның мақсаты – Қазақстан мен Еуропалық Одақ арасындағы екіжақты диалогты нығайту және жоғары білім, академиялық ұтқырлық пен мәдени алмасу салаларында ұзақ мерзімді серіктестіктің жаңа түрлерін дамыту болды, деп хабарлайды DKnews.kz.
Дөңгелек үстел Қазақстан мен ЕО арасындағы Кеңейтілген серіктестік пен ынтымақтастық туралы келісімге негізделген белсенді саяси және институционалдық диалогтың жалғасы ретінде өтті.
Қатысушыларға құттықтау сөзін «DCAS» төрайымы, Еуропарламент депутаты Джузи Принчи, ҚР жоғары білім және ғылым министрі Саясат Нұрбек (онлайн), Қазақстанның ЕО жанындағы Елшісі Марғұлан Баймұхан және Еуропарламенттің Сыртқы істер комитеті төрағасының орынбасары Альберико Гамбино жолдады.
«ЕО мен Қазақстан арасындағы білім беру саласындағы ынтымақтастықты дамыту – академиялық диалог пен стратегиялық серіктестікті нығайту» атты алғашқы панель аясында Қазақстанның ғылыми және академиялық қауымдастық өкілдері – Қазақстан Республикасының Президенті жанындағы Қазақстан стратегиялық зерттеулер институтының директоры Еркін Тұқұмов, Нархоз университетінің халықаралық ынтымақтастық және даму жөніндегі вице-президенті Айгерім Райымжанова, сондай-ақ Құқық және мемлекеттік басқару мектебінің директоры Талғат Сәрсенбаев сөз сөйледі. Еуропа тарапынан Еуропарламент депутаттары Мануэла Рипа мен Катарина Рот Неведалова баяндама жасады.
Спикерлер өз сөздерінде академиялық ұтқырлықтың маңызын, бірлескен ғылыми зерттеу бағдарламаларын құру қажеттілігін және ғылым мен жоғары білімнің ЕО мен Қазақстан арасындағы стратегиялық байланыстарды нығайтудағы рөлін атап өтті.
«Өзара тиімді мәдени ынтымақтастық пен алмасудың жаңа көкжиектері» атты екінші панель мәдени дипломатия, тарихи және мәдени мұраны сақтау, сондай-ақ креативті индустрияларды дамыту мәселелеріне арналды. Бұл тақырыпта ЮНЕСКО жанындағы Қазақстанның Тұрақты өкілі Асқар Абдрахманов және Еуропарламенттің Мәдениет жөніндегі комитеті төрағасының орынбасары Богдан Анджей Здроевский сөз сөйледі.
Іс-шара барысында бірлескен мәдени жобаларды іске асыру, сондай-ақ Қазақстанның мәдени мұрасын ЕО елдерінде ілгерілету мәселелеріне ерекше назар аударылды.
Қатысушылар «Erasmus+» сияқты академиялық алмасу бағдарламаларын ілгерілету, білім беруді цифрландыру, мәдениет арқылы орнықты даму, жастар бастамалары, инклюзивті және тұрақты қоғам құрудағы білім мен мәдениеттің рөлі жөнінде пікір алмасты.
Қазақстан Президенті Қасым-Жомарт Тоқаевтың бастамаларына ерекше назар аударылды. Ол Самарқандтағы «ЕО – Орталық Азия» саммитінде өңір елдерінің «Erasmus+CA» бағдарламасына қатысуын кеңейтудің маңызын атап өтіп, оны ғылыми-білім беру ынтымақтастығы мен адамдар арасындағы байланыстарды нығайтудың маңызды құралы ретінде сипаттады.
Сонымен қатар Еуропалық Одақтың Қазақстанға ЕО мен ҚР арасында визалық режимді жеңілдету бойынша келіссөздерді бастауға мандат беру туралы шешімі де аталып өтті. Бұл мәдени және гуманитарлық ынтымақтастықты кеңейтуге және қазақстандық пен еуропалық қоғамдастықтардың жақындасуына бағытталған маңызды қадам саналады.
Еуропарламенттің, ЕО-ның академиялық және сараптамалық қоғамдастығының өкілдері Қазақстанды Еуропалық Одақтың Орталық Азиядағы негізгі серіктестерінің бірі деп атап, онымен ұзақ мерзімді стратегиялық маңызы бар мәселелер бойынша диалогты одан әрі дамытуға мүдделі екенін білдірді.
Аталған дөңгелек үстел Қазақстан мен Еуропалық Одақ арасындағы гуманитарлық саладағы белсенді диалогтың қисынды жалғасы болды. Ол Еуропарламентте бұған дейін өткен, екіжақты ынтымақтастықтың басқа бағыттарын қамтитын іс-шараларды толықтырды.
Қатысушылар академиялық, мәдени және жастар қауымдастықтары өкілдерінің қатысуымен осындай іс-шараларды тұрақты түрде өткізудің ЕО мен Қазақстан арасындағы ұзақ мерзімді серіктестікті нығайтудың тиімді құралы екендігін атап өтті.
