Агенттік өкілі Лондондағы Kazakhstan Equity Capital Markets Day шарасына қатысты, деп хабарлайды DKNews.kz.
Лондонда шетелдік инвесторлар үшін «Қазақстан қор биржасы» АҚ (KASE), Қазақстан Республикасының Ұлттық Банкі және Қазақстан Республикасының Қаржы нарығын реттеу және дамыту агенттігі ұйымдастырған Kazakhstan Capital Markets Day іс-шарасы өтті.
Kazakhstan Equity Capital Markets Day әлеуетті инвесторлар Қазақстанның макроэкономикалық көрсеткіштерімен, қаржы нарығын дамыту туралы өзекті деректермен және халықаралық инвесторлардың қазақстандық капитал нарығына қатысу перспективаларымен таныса алатын алаң болып табылады.
Іс-шараға Қаржы нарығын реттеу және дамыту агенттігінің, Қазақстан Республикасы Ұлттық Банкінің, сондай-ақ қаржы және даму институттарының өкілдері қатысты.
Өз сөзінде Бағалы қағаздар нарығы департаментінің директоры Айдын Дәулетбақ Қазақстанның бағалы қағаздар нарығы қарқынды дамып келе жатқанын атап өтті.
«Акциялардың нарықтық капитализациясы жыл басынан бері 22%-ға ұлғайып, 73 млрд долларға жетті және ЖІӨ-нің 28%-ын құрады. Айналыстағы корпоративтік облигациялардың жалпы көлемі – 26 млрд доллар. 2025 жылдың алғашқы тоғыз айында компаниялар қор нарығы арқылы 15,7 миллион доллар тартты. Инвесторлардың қатысуы өсуін жалғастыруда: елімізде 4,6 млн астам бөлшек және корпоративтік шоттар ашылды, бұл қаржылық сауаттылықтың өсуі, цифрлық құралдарды дамыту және жаңа IPO өткізудің нәтижесінде мүмкін болды» Айдын Дәулетбақ
Сондай-ақ, спикер цифрландыру қазіргі уақытта дамудың стратегиялық басымдықтарының бірі болып табылатынын атап өтті. Агенттік Ұлттық Банкпен бірлесіп цифрлық қаржы активтері үшін айқын құқықтық негіз әзірлеуде. Цифрлық құралдар дәстүрлі бағалы қағаздар сияқты пруденциялық стандарттар бойынша реттелетін болады. Бұл шаралар Қазақстанның өңірлік қаржылық-технологиялық хаб болуға деген ұмтылысын қолдай отырып, қауіпсіз және инновациялық цифрлық нарық үшін негіз болмақ.
Сөзін қорытындылай келе, Айдын Дәулетбақ Агенттіктің негізгі бастамаларының бірі — «Бағалы қағаздар нарығы туралы» жаңа заңды әзірлеуді ұсынды, оның мақсаты бағалы қағаздар нарығын, исламдық қаржыны және цифрлық активтерді реттейтін заңнаманы бірыңғай келісілген құқықтық жүйеге біріктіру болып табылады.
