Астана қаласында Қазақстан Республикасы Оқу-ағарту министрлігінің «Республикалық қосымша білім беру оқу-әдістемелік орталығы» РМҚК және Қазақстан Республикасы Ұлттық ұланы Бас қолбасшылығы арасында ынтымақтастық туралы екіжақты меморандум жасалды, деп хабарлайды DKNews.kz.
Аталған орталыққа Ұлттық ұлан Бас қолбасшысының тәрбие және әлеуметтік-құқықтық жұмыстар жөніндегі орынбасары генерал-майор Қайрат Үмбетов арнайы барып, екіжақты ынтымақтастық жайын талқылады. Кездесу барысында генерал-майор Қайрат Үмбетов пен Республикалық қосымша білім беру оқу-әдістемелік орталығының директоры Раиса Шер ортақ меморандумға қол қойды.
"Бұл маңызды стратегиялық байланыс жасөспірімдердің бойындағы патриоттық сезімді оятып, өз Отанына деген сүйіспеншілікті арттыруды көздейді. Сондай-ақ жастарды азаматтық борыш пен Отан мүддесін қорғау жөніндегі конституциялық міндеттерді орындауға бейімдеуге бағытталған" Генерал-майор Қайрат Үмбетов
Ендігіде екі серіктес педагогтар мен мамандар, әскери-патриоттық клуб басшылары үшін ұйымдастырылатын іс-шараларды, вебинарлар мен шеберлік сыныптарын, біліктілікті арттыру курстарын бірлесіп өткізетін болады. Сонымен қатар тәжірибе алмасу жиындары да тұрақты өткізіледі.
"Ортақ келісімнің нәтижесінде Ұлттық ұлан Бас қолбасшылығының көмегімен әскери-патриоттық бағытты дамыту мәселелері бойынша байқауларды, ойындарды, конференцияларды, дөңгелек үстелдерді және өзге де іс-шараларды бірге ұйымдастыруды қолға аламыз. Өткізетін немесе іске асқан іс-шаралар туралы ақпараттармен де алмасып отырамыз. Осындай тығыз ынтымақтастық қай тарапқа болмасын пайда әкелетініне сенімдіміз" Раиса Шер
Айта кетейік, 2023 жылы «Жас Бүркіт» әскери-патриоттық қозғалысына 20 жыл толады. Бұл патриоттық қозғалысқа республиканың 59 мектебі мен 3 колледжінің білім алушылары тартылған.
Бүгінде 2044 балаға арналған 108 сыныпта Қазақстан Республикасы Ұлттық ұланының офицерлері сабақ өткізеді.
