Еңбек және халықты әлеуметтік қорғау вице-министрі Назгүл Сағындықова Шымкент қаласына жұмыс сапары аясында бірқатар әлеуметтік мекемелердің жұмысымен танысып, мегаполис тұрғындарымен кездесу өткізді. Ол атаулы әлеуметтік көмектің (бұдан әрі – АӘК) алдағы трансформациясы және мүгедектігі бар адамдардың өмір сүру сапасын арттыру шаралары туралы айтып берді, деп хабарлайды DKNews.kz.
Жұмыс сапары аясында вице-министр балаларға арналған № 8 «Қамқорлық» арнаулы әлеуметтік қызметтер көрсету орталығының жұмысымен танысты, сондай-ақ «Белсенді ұзақ өмір сүру», «Ізетті зейнеткер», сондай-ақ «Бақытты жанұя» орталықтарына барды.
Үкіметтік емес ұйымдардың өкілдерімен және Шымкент қаласының тұрғындарымен кездесу барысында Назгүл Сағындықова атаулы әлеуметтік көмекті трансформациялау мәселелеріне егжей-тегжейлі тоқталып, жаңа әлеуметтік саясаттың іске асырылуы туралы хабардар етті.
«Биыл 7 ақпанда Үкіметтің кеңейтілген отырысында Мемлекет басшысы әлеуметтік көмек пен қолдау жүйелерін қайта қарау міндетін қойды. Осыған байланысты Отбасының цифрлық картасын және мемлекеттік және мемлекеттік емес ұйымдардың жүйелерімен жаңа интеграцияларды пайдалана отырып, АӘК-ті толық трансформациялау күтіп тұр», – деді Сағындықова.
Мұқтаж отбасыларға кешенді қолдау көрсетудің нақты регламенті әзірленетін болады. Оның құрамына АӘК, тұрғын үй көмегі, жалға берілетін тұрғын үйді жалдауды субсидиялау, жеңілдікпен жол жүру және т.б. көмек азық-түлік сатып алуға ғана емес, сонымен қатар өмір сүру үшін қалыпты жағдай жасауға да берілетін болады.
Сондай-ақ, вице-министр мүгедектігі бар адамдардың өмір сүру сапасын жақсарту және олардың қоғамға әлеуметтік интеграциясы бойынша қабылданып жатқан шаралар кешені туралы айтты. Осы мақсатта бірнеше пилоттық жобалар іске асырылуда: Астана және Алматы қалаларында такси агрегаторлары арқылы инватакси қызметтерін көрсету; сырттай белсенді форматта мүгедектікті белгілеу; 6 өңірде сыйымдылығы аз үйлерді енгізу; 4 өңірде мүгедек балаларға арналған техникалық оңалту құралдарын жеке таңдау.
«Биыл Министрлік жұмысының негізгі бағыттары ҚР инклюзивті саясат тұжырымдамасын әзірлеу және қабылдау, әлеуметтік қызметтер көрсету жүйесін трансформациялау және халыққа әлеуметтік қызмет көрсету орталықтарының қызметін цифрландыру болып табылады.
Мемлекет Басшысы қойған негізгі міндеттердің бірі мүгедектігі бар адамдарды инфрақұрылым объектілеріне қолжетімділікпен қамтамасыз ету болып табылады. Министрлік бұл жұмысты «Amanat» партиясының жол картасы аясында жергілікті атқарушы органдармен бірлесіп жүргізуде. Шымкентте өткен жылы 196 объектіні бейімдеу жұмыстары жүргізілді. Биыл 772 әлеуметтік маңызды нысанды бейімдеу бойынша шаралар қабылдау қажет», – деп түйіндеді Назгүл Сағындықова.
