Алматы қаласында орналасқан 3650 әскери бөлімінің сарбаздарына еліміздің жоғарғы оқу орындарына түсуге арналған тегін білім гранттарының арнайы сертификаты табысталды, деп хабарлайды DKnews.kz.
Бұл жөнінде Қазақстан Республикасы Ұлттық ұланы «Оңтүстік» өңірлік қолбасшылығының баспасөз қызметі хабарлады. Тегін білім алуға мүмкіндік беретін гранттар жауынгерлік қызмет және жауынгерлік дайындық барысында ерекше көзге түскен сарбаздарға берілген.
Олар Отан алдындағы борышын өтеу үшін әскерге бір жыл бұрын келген. Енді үйіне оралар кезінде жауынгерлер осындай жағымды жаңалық естіп отыр.
Отан алдындағы борышын атқару барысында үздік деп танылған құқықтық тәртіп әскерінің сарбаздарына Қорғаныс министрлігінің тарапынан бөлінген сертификаттар әскери бөлім алаңында салтанатты түрде табыс етілді.
- Ұлттық ұланның 3650 әскери бөлімінде әр ер азаматтың міндеті болылып табылатын Отан алдындағы парызымды атқарып жүрмін. Әскерге келіп армандаған жоғарғы оқу орнына түсуге мүмкіндік алып отырмын. Болашағыма жол ашқан, Отан қорғаушы ретінде қалыптасуға көмектесіп, тәжірибесімен бөліскен командирлеріме ерекше алғыс білдіремін, - дейді грант иегері Төленді Қалмұхамбет.
Ол еліміздегі беделді оқу ордасының бірі Әл-фараби атындағы Қазақ Ұлттық университетіне оқуға түсуді жоспарлап отыр. Айта кетейік, мұндай грантқа қол жеткізген сарбаздар енді еліміздегі таңдаулы оқу орындарына ұлттық бірыңғай тестілеуден өтпей-ақ түсе алады.
- Жас сарбаз әскер қатарына келгенде өзінің қай оқу орнына түскісі келетінін көрсетіп баянат жазады. Біз оны «Срочник 2.0» цифрлық платформада көрсетеміз. Бұл сертификат нақты мамандыққа берілмейді. Ертең үйіне жеткенен кейін қандай мамандық бар, өздері таңдау жасайды. Шектеу жоқ, - дейді бөлім командирінің тәрбие және әлеуметтік-құқықтық жұмыстар жөніндегі орынбасары подполковник Фахритдин Абдрахманов.
Сарбаздарға берілетін сертификат 2 жылға дейін жарамды. Осы уақыт ішінде талапкер таңдаған жоғарғы оқу орнына барып тіркелуі тиіс. Оларға шәкіртақы төленіп, жатақханадан орын да беріледі.
