Ұлттық кітап күніне орай Астанада «Кітап оқу сарқылмас рухани әлемге апарар жол» атты ғылыми-практикалық конференция өтті, деп хабарлайды DKnews.kz.
Іс-шараны орталықтандырылған кітапхана жүйесі ұйымдастырды, деп хабарлайды елорда әкімдігінің ресми сайты.
Конференция кітапханашылардың, ақындардың, жазушылардың, студенттердің және кітапханалардың тұрақты оқырмандарының басын қосты.
Қатысушылар кітапхана ісін дамытудың негізгі бағыттарын талқылады. Олар өз тәжірибелерін ортаға салды, кітапханаларды жаңғыртуға, жаңа технологияларды енгізуге және оқырмандар үшін қолайлы орта құруға қатысты маңызды мәселелерді көтерді. Жасанды интеллектінің қоғамға әсері, кадрлық әлеуетті дамыту және кітапхана саласындағы өзекті әлемдік үрдістер сияқты тақырыптар басты назарда болды.
«Бұл ғылыми конференцияның басты мақсаты – кітапқа бей-жай қарамайтын адамдарды бір жерге жинау, кітап мәдениетін дамытуға байланысты мәселелерді көтеру және оны насихаттаудың жаңа жолдарын табу. Бүгінгі міндет – оқырмандармен осы бағытта ой бөлісу. Конференцияға қаламыздың ірі кітапханаларының басшылары қатысты. Оның ішінде Ұлттық академиялық кітапхана мен Назарбаев Университеті кітапханасының басшылары арнайы келді. Айта кету керек, мұнда кітапханашылар ғана емес, кітапты шын жүрегімен сүйіп оқитындар мен бағалайтындар да жиналды», - деді Астана қаласы әкімдігінің орталықтандырылған кітапхана жүйесінің директоры Гүлбадан Мәдібаева.
Іс-шара барысында Астана кітапханаларының соңғы 3-4 жылдағы жетістіктері де қозғалды.
Сонымен, бұрын жүйеде 18 кітапхана болса, 2024 жылы оған тағы 4 кітапхана қосылды.
«Биыл біз тағы 3 жаңа ғимарат сатып алып жатырмыз. Жасыратыны жоқ, бірнеше жыл бұрын, технология қарқынды дами бастаған кезде, қағаз кітаптарды оқуға деген қызығушылық айтарлықтай төмендеді. Алайда, соңғы жылдары кітап оқуға деген қызығушылықтың өсуі байқалады. Кітапханаларда тұрақты оқырмандар қалыптасты. Кітапханаларымыздағы барлық қызмет, оның ішінде Wi-Fi-ға кіру тегін екенін ескеру маңызды. Көбісі таңертең келіп, кітапхана жабылғанға дейін болады. Кітап оқу жанға жайлылық сыйлайды әрі мұнда ерекше атмосферада уақыт өткізуге болады», - деп қосты Гүлбадан Мәдібаева.
Іс-шара барысында кітапханаларда жаңа комьюнити орындар құрылатыны, олардың әлеуметтік және мәдени маңыздылығын арттыратын қауымдастық және Book Hub бұрыштарын құру идеялары айтылды.
