16 тамыз күні Алматыда Панфилов көшесінде «Жасыл қозғалғыштық апталығы» ресми түрде ашылды. Мерекелік шараға қала және Алмалы ауданы әкімдігінің өкілдері, Қытайдың Алматыдағы Бас консулдығы, Yutong компаниясы, қала тұрғындары мен қонақтары қатысты.
Көше шеберлік сабақтары, ойындар және интерактивті аймақтар арқылы нағыз экологиялық кеңістікке айналды, деп хабарлайды DKNews.kz.
«Таза сулар мен жасыл таулар – баға жетпес қазына»
Алматыдағы Қытайдың Бас консулы, Цзян Вэй ханым құттықтау сөз сөйледі.
Ол экологиялық күн тәртібі екіжақты ынтымақтастықтың маңызды бөлігіне айналғанын атап өтті:
«Қытай мен Қазақстан – тату көршілер, сенімді әріптестер және ежелгі достар. Біздің елдерді мызғымас достық пен орнықты дамуға бағытталған ұқсас көзқарастар байланыстырады. ҚХР Төрағасы Си Цзиньпин: “Таза сулар мен жасыл таулар – баға жетпес қазына” деген болатын. Бүгін біз “Таза Қазақстан” бастамасын қолдай отырып, жасыл, таза әрі әсем болашақты бірге құрып жатырмыз».
Алмалы ауданы – жасыл қадамдар
Алмалы ауданы әкімінің орынбасары Руслан Идрисов экология әрбір тұрғынның қарапайым қадамдарынан басталатынын айтты:
«“Жасыл қозғалғыштық апталығы” сияқты акциялар қала тұрғындарын нақты өзгерістерге тартады. Экология – бұл абстрактілі ұғым емес, бұл – нақты әрекеттер. Бүгін біз тағы бір қадам жасадық».
Yutong үлгі көрсетеді
Yutong компаниясының Орта Азия бойынша өңірлік директоры Ли Хайфэн компанияның қала дамуына қосқан үлесі туралы айтты:
«Жасыл түс – қаланың дамуының негізі, ал төмен көміртекті бағыт – болашақ көлігінің жолы. Алматы көшелерінде жұмыс істеп жүрген біздің қос қуатты троллейбустарымыз шығарындыларды азайтып, сапарларды қауіпсіз әрі жайлы етті. Болашақта біз әкімдікпен және серіктестерімізбен ынтымақтастықты жалғастырып, электробустар мен смарт-көлік шешімдерін енгіземіз».
Ұлттық бағдарламамен үндестік
Алматы қаласы Экология департаменті басшысының орынбасары Мадияр Қожекенов жобаны ұлттық күн тәртібімен байланыстырды:
«Өткен жылы Қазақстан Президенті Қасым-Жомарт Тоқаев “Таза Қазақстан” бастамасын ұсынды. Ол халық арасында кең қолдау тапты. Бүгін әр тұрғын экологиялық жауапкершілікке өз үлесін қосуда, ал “Жасыл қозғалғыштық апталығы” – осы бағыттағы тағы бір қадам».
Тұрғындар жасыл жолды таңдайды
Салтанатты ашылу лента қию рәсімімен және интерактивті ойындармен аяқталды. Қала тұрғындары «велосипед-дробилкасын» сынап көрді, балалар пластикті қайта өңдеу бойынша шеберлік сабақтарына қатысты, ал ересектер төмен көміртекті қалалардың болашағын көрсететін VR-тәжірибені тамашалады.
Апта енді ғана басталды, алматылықтарды экология мен жасыл көлікке арналған ондаған іс-шара күтіп тұр. Салтанатта айтылғандай: «Бүгінгі күн – жасыл сапарлар күнделікті өміріміздің бір бөлігіне айналатын жаңа бастау болсын».
