Авиация саласында әр минут маңызды. Әуежайда ұшуға дейін орындалатын барлық рәсімдер нақты регламентке сәйкес бекітілген және оларды кешіккен жолаушылар үшін өзгерту мүмкін емес, деп хабарлайды DKNews.kz.
Әуежайға алдын ала келуді жоспарлаңыз
Жолдағы кептеліс, ауа райы жағдайы немесе әуежайдың жүктемесі секілді факторлерді ескере отырып, жолаушыларға әуежайға ертерек келуге кеңес беріледі. Жолға шығу уақытын тіркеу бағанасында немесе өзіне қызмет көрсету терминалдарында ұшудан бірнеше сағат бұрын болатындай етіп жоспарлау қажет. Тіркеу аяқталғаннан кейін бірнеше минутқа кешігу де рейске отырғызуда мүмкін емес етеді («FlyArystan» АҚ Жолаушыларды әуе көлігімен тасымалдау және қосымша қызметтер көрсету қағидаларының 4-бөлімі, 19-бабы, 19.1-тармағына сәйкес).
Тіркеудің жабылу уақыты
FlyArystan әуекомпаниясында ішкі және Қазақстаннан ұшатын халықаралық рейстерге жолаушыларды тіркеу және тіркелген жолжүкті өткізу ұшуға 40 минут қалғанда аяқталады. Шетелдік әуежайларда тіркеу ұшуға 60 минут қалғанда жабылуы мүмкін. Әрі қарай, тіркеу жүйесі жабылады және оған деректерді енгізу мүмкін болмайды. Бұл тек әуекомпаниясының ережесі ғана емес, Қазақстан Республикасының авиациялық стандарттары мен заңнамасының талабы болып табылады (Жолаушыларды әуе көлігімен тасымалдау қағидаларының 19.1-тармағына және жолаушылардың деректерін, құжаттары мен жолжүгін бортқа кіргізуге дейін толық тексеруді талап ететін ҚР заңнамасына сәйкес).
Ұшуға дейінгі рәсімдер
Тіркеу аяқталғаннан кейін жолаушылар туралы барлық ақпарат тиісті бөлімдерге жіберіледі. Сол мезетпен қатар қауіпсіздіктің маңызды қадамдарына жататын ұшуға дейінгі рәсімдер басталады. Бұл рәсімдердің уақыты қатаң регламенттелген және оларды өткізуге болмайды.
Сонымен қатар, жолаушылар шекаралық бақылау және ұшуға дейінгі тексеру секілді бірнеше маңызды кезеңнен өтеді. Ұшуға дейінгі тексеру кезінде жеке басын куәландыратын құжаттар, қол жүгін тексеру және жеке қауіпсіздік бақылауы жүргізіледі. Әсіресе қарбалас уақытта бұл тексеру бірнеше минуттан жарты сағатқа дейін уақыт алуы мүмкін. Бұл рәсімнен өту міндетті және жеделдетілмейді, өйткені қауіпсіздік талаптары барлық жолаушыларға бірдей қолданылады. Шекаралық бақылау мен тексеруден тек бір әуекомпаниясының емес, барлық сапарға шыққан жолаушылар өтетіндіктен, қызмет көрсету жалпы кезек тәртібімен жүргізіледі.
Осыдан кейін жолаушыға ұшаққа отырғызу қақпасына (гейтке) өту қажет. Қақпа әуежайдың құрылымына байланысты ұшуға дейінгі тексеру нүктесінен айтарлықтай қашықтықта орналасуы мүмкін. Отырғызу да қатаң уақытпен шектеледі: жолаушы ұшуға 30 минут қалғанда қақпаның жанында болуы тиіс. Отырғызу аяқталған соң трап немесе телетрап алынады, әуе кемесінің есіктері жабылады, экипаж ұшуға дейінгі тексеруді бастап, қозғалтқыштар іске қосылады. Бұл кезеңде жолаушылар ұшақтан бірнеше қадам жақындықта болса да, рейске жіберілмейді.
Тіркеуге немесе отырғызуға бірнеше минут кешігу әуекомпаниясы мен әуежайдың жоспарланған жұмыс кестесін бұзуы мүмкін. Бұл кестенің артында көптеген үйлестірілген рәсімдер мен қызметтер тұр. Олар әр жолаушының және бүкіл рейстің қауіпсіздігін қамтамасыз етуге бағытталған, сондықтан кешіккен жолаушыны бекітілген кезеңдерден тыс кіргізу мүмкін емес.
Кестенің бұзылуы тек келесі рейстердің уақытына ғана емес, сонымен қатар рейске қызмет көрсететін ондаған бөлімшелердің жұмысына әсер етеді. Себебі рейс кезінде тек әуекомпанияның (ұшақтар, экипаж, жердегі қызметкерлер және т.б.) ғана емес, әуежайдың да (ұшу-қону жолағы, тұрақ, трап, автобустар, тіркеу орындары және т.б.), сондай-ақ шекаралық бақылау және басқа қауіпсіздік қызметтерінің ресурстары тартылады.
Лоукостерлер үшін бұл неге ерекше маңызды
FlyArystan қолданатын лоукост-модельде рейстердің көбі айналымдық принципі бойынша орындалады. Бұл ұшақ әуежайға қонып, небәрі 30 минуттан кейін келесі рейске ұшатынын білдіреді. Мұндай қысқа уақыт аралығы әуе кемесін тиімді пайдалануға мүмкіндік береді. Әуе кемесінің әрбір жоспардан тыс тоқтап тұру минуты қосымша шығындарға және басқа бағыттардағы тізбекті кідірістерге әкелуі мүмкін. Оның салдарынан әуежайдағы бөлінген уақыт слоттарын жоғалтуға және билеттер бағасының қымбаттауына әкелуі ықтимал.
FlyArystan статистикасы
2024 жылғы деректер бойынша, әр рейске орта есеппен бес жолаушы отырғызуға келмейді. Оның ішінде кешіккендер де бар.
Жолаушы үшін кешігудің қаржылық салдары
Егер жолаушы рейске кешіксе немесе мүлде келмесе, оның әуебилеті жарамсыз болып қалады және қайтаруға немесе айырбастауға жатпайды. Билетті басқа рейске ауыстыру ішкі бағыттарда – ұшуға кемінде 2 сағат, халықаралық бағыттарда – кемінде 3 сағат қалғанда ғана мүмкін және бос орындар болған жағдайда жүзеге асырылады.
Рейске кешікпеу үшін пайдалы кеңестер
- Ішкі рейстерге кемінде 2 сағат, халықаралық рейстерге 3 сағат бұрын келіңіз.
- Әуежайға келген бойда тіркеуден өтіп, жолжүкті тапсырып, тексеруден өтіңіз.
- Ерте рейстерге таксиді алдын ала тапсырыс беріп, кептелістен қашу үшін ең қолайлы маршрутты жоспарлаңыз.
- Әсіресе халықаралық рейстерде ұшатын әуежайыңыздың жергілікті уақыт белдеуін нақтылап алыңыз.
- Әуежайдағы ақпараттық тақтадан тіркеу және отырғызу уақытын, сондай-ақ отырғызу қақпасының нөмірін үнемі тексеріп отырыңыз: отырғызу уақыты мен қақпа нөмірі билетте көрсетілгеннен өзгеруі мүмкін.
FlyArystan жолаушыларға әуежайда кезекке тап болмау үшін ұшу алдында FlyArystan қосымшасы немесе www.flyarystan.com ресми сайты арқылы тегін онлайн-тіркеуден алдын ала өтуге кеңес береді. Лоукостер тасымалдаушы моделіне сәйкес әуежайда тіркеу мен қосымша жолжүкті рәсімдеу айтарлықтай қымбат болуы мүмкін, сондықтан барлық қызметті алдын ала онлайн рәсімдеген тиімді.
Тіркеу ұшуға 30 күн қалғанда (Қытай бағыттарындағы рейстерге тіркеу ұшуға 10 күн қалғанда) ашылады. Дегенмен, онлайн-тіркеуден өткен жағдайда да жолаушы ұшуға 30 минут қалғанда отырғызу қақпасының алдында болуы тиіс.
Осы ұсыныстарды сақтау барлық рәсімдерден асықпай өтуге, күйзелісті болдырмауға және сапарыңызды уақытында бастауға көмек болары анық.
