Қарағанды экономикалық университеті билік, қоғам және азаматтық белсенділер арасында ашық әрі мазмұнды диалог алаңына айналды, деп хабарлайды DKNews.kz.
Мұнда облыстық Азаматтық форум өтіп, оған мемлекеттік органдардың, Қазақстан халқы Ассамблеясының, этномәдени бірлестіктердің, үкіметтік емес ұйымдардың, қоғамдық кеңестердің, БАҚ өкілдерінің, блогерлердің, студенттердің және жастар көшбасшыларының 120 өкілі қатысты. Форумның басты назарында – азаматтық бастамаларды қолдаудың заманауи тәсілдері мен белсенді азаматтық қоғамды дамыту мәселелері болды.
Форумның негізгі мақсаты – ҮЕҰ, азаматтық қоғам мен жергілікті атқарушы органдар арасындағы өзара іс-қимылды күшейту. Форум аясында ҮЕҰ және мемлекеттік әлеуметтік тапсырыс туралы заңдар талқыланып, ұсыныстар ұлттық деңгейге жеткізілді.
Форумды ұйымдастырушылар – ішкі саясат басқармасы және өңірлік Азаматтық альянс. Іс-шараның модераторы, Қарағанды облысы Кәсіпкерлер қауымдастығының атқарушы директоры Серік Мәлібекұлы қатысушыларға Президент Қасым-Жомарт Тоқаевтың IV Ұлттық құрылтайда айтқан тезистерін еске салды. Мемлекет басшысы мемлекет пен қоғам арасындағы жасампаз серіктестік өзгерістердің қозғаушы күші және тұрақты дамудың кепілі болуы тиіс екенін атап өткен еді.
Серік Мәлібекұлы дәл осындай серіктестіктің Қарағанды облысында табысты түрде қалыптасып келе жатқанын айтты. Мұнда жыл сайын 200-ден астам әлеуметтік жоба мемлекеттік әлеуметтік тапсырыс пен гранттық бағдарламалар аясында жүзеге асады – халықтың осал топтарын қолдаудан бастап, цифрлық сауаттылықты арттыру, медиация және жастарға кәсіби бағдар беру жұмыстарына дейін. ҮЕҰ мен мемлекеттік құрылымдар арасындағы диалог ашықтық, жариялылық және тең әріптестік қағидаттарына негізделген. Мұндай тәсіл нақты нәтижелерге қол жеткізуге, қоғам пікірін ескеруге және мәселелерге жедел әрекет етуге мүмкіндік береді. Бүгінде үкіметтік емес сектор өкілдері мәслихаттарда, қоғамдық кеңестер мен сараптамалық комиссияларда белсенді жұмыс істеуде.
Облыс әкімінің орынбасары Әлібек Үсенұлы өз сөзінде мемлекеттің күші тек экономикалық көрсеткіштермен ғана емес, азаматтық қоғам белсенділігімен де өлшенетінін атап өтті. Ол ҮЕҰ әлеуметтік мәселелерді шешуде маңызды рөл атқаратынын, бұл жерде ашықтық, сенім мен азаматтардың қатысуы қажет екенін айтты. Өңірде ҮЕҰ қатысуымен бірқатар маңызды жобалар жүзеге асырылуда. Мысалы, Ten Qogam орталығы мүмкіндігі шектеулі жандар мен олардың отбасыларына қолдау көрсетуде, ал ҮЕҰ-ға арналған ақпараттық-білім беру орталығы – белсенді азаматтар үшін кездесу және ынтымақтастық алаңы болып отыр. Қоғамдық ұйымдар нашақорлық пен құмар ойындардың алдын алу жұмыстарын жүргізуде, ал өңірдің эковолонтерлері «Таза Қазақстан» ауқымды акциясына қатысып жатыр.
Азаматтық қоғам істері комитетінің төрайымы, ҚР Мәдениет және ақпарат министрлігінің өкілі Гүлбара Бекетқызы заңнамадағы жаңашылдықтар туралы айтып берді. Қазіргі таңда ҮЕҰ туралы жаңа заң әзірленіп жатыр. Оның мақсаты – үкіметтік емес сектордың тұрақтылығын нығайту, тиімділігі мен бәсекеге қабілеттілігін арттыру, әсіресе ауылдық жерлерде. Гүлбара Бекетқызы ауылдағы көптеген ұйымдардың тәжірибе жетіспеуінен байқауларға қатыса алмайтынын атап өтті. Мұндай жағдайлар үшін бағалау жүйесін кезең-кезеңімен енгізу жоспарлануда, бұл жаңадан құрылған ҮЕҰ-лардың жұмысқа араласуына мүмкіндік береді.
Спикердің айтуынша, Қарағанды облысында мемлекеттік әлеуметтік тапсырыс бойынша жұмыс жолға қойылған, алайда оған тек төрт басқарма – білім, спорт, ішкі саясат және жастар саясаты басқармалары ғана қатысуда. Оның пікірінше, серіктестер аясын кеңейтіп, экология басқармасы сияқты өзге де құрылымдарды тарту қажет. Сондай-ақ, гранттық жобалар форматын белсендірек дамыту керек – бұл жерде мемлекеттік орган мәселені ұсынады, ал ҮЕҰ өз шешімін ұсына алады.
Қазақстанның Азаматтық альянсының президенті Бану Ғаниқызы ауылдық ҮЕҰ-ларды күшейту қажеттігін қолдап, облыста ҮЕҰ үйін құруды ұсынды — бұл азаматтық ұйымдар әкімшілік, кеңестік және ресурстық қолдауға ие бола алатын бірыңғай кеңістік болады.
Форум аясында секциялық отырыстар өтті. Онда қайырымдылықты өңірлік өсудің құралы ретінде дамыту, цифрландыру мен жасанды интеллектіні енгізудің азаматтық сектор үшін тәуекелдері, жаңа ҮЕҰ туралы заң жобасы, адам құқығын қорғау бастамалары және этносаралық келісім мәселелері талқыланды.
Форумның қорытындысы ретінде «Қазіргі Қазақстан» көрмесі және ерекше білім беру қажеттіліктері бар балалардың сурет көрмесі өтті — бұл азаматтық қоғамның кім үшін және не үшін дамып жатқанын еске салатын жарқын іс-шара болды.
