Астанадағы Орталық саябақта «Жастар Рухы» жастар қанатының бастамасымен салауатты өмір салтын дәріптейтін «Чемпиондық рух» жобасы аясында жаттығу ұйымдастырылды, деп хабарлады елорда әкімдігінің ресми сайты.
Іс-шараның басты мақсаты – жастар мен қала тұрғындарын спортқа баулу, белсенді өмір сүруді насихаттау және жаттығу мәдениетін қалыптастыру, деп хабарлайды DKNews.kz.
Жоба Астана қаласында қоғамға таныстырылып, тұрақты түрде жалғасатын болады.
Жобаны қолдау мақсатында іс-шараға еліміздің танымал спортшылары қатысып, өз тәжірибесін бөліседі. Бірінші іс-шараға жастардың арасында танымал әрі пауэрлифтинг шебері Айтым Жақыпов келді.
«Әр апта сайын жобамыздың орны ауысып тұрады. Біз барынша адам көп жүретін жерлер мен саябақтарды таңдаймыз. Бүгін ауа райы салқын болса да, 70-тен астам қатысушы жиналды. Мақсатымыз – мегаполистің белсенді тұрғындарының басын бір жерге біріктіру. Енді алдағы уақытта шайбалы хоккейден ұлттық құраманың мүшесі Әлихан Әсетов, бокстан әлем чемпионатының бірнеше мәрте жүлдегері, Азия чемпионы Абылайхан Жүсіпов сынды спортшыларды шақыруды жоспарлап отырмыз» «Жастар Рухы» ЖҚ өкілі Диас Түгелбаев
Іс-шара барысында жастар танымал спортшымен бірге түрлі қызықты жаттығулар жасап, ақыл-кеңестерін тыңдады.
