2025 жылы «Петроглиф ізшілері» қорының еріктілері Алматы, Жамбыл және Жетісу облыстарының аумақтарында бұрын ғылымға беймәлім 11 петроглиф шоғырының орнын анықтады. Сондай-ақ бұрын белгілі нысандардың аумағынан онға жуық жаңа петроглиф шоғырлары табылды. Ерте темір дәуірі мен түркі кезеңіне жататын, археологиялық ескерткіштер тізіміне енбеген жиырмаға жуық қорым анықталды (жалпы қорған саны 300-ден асады). Сонымен қатар ондаған көне қоныс пен XVIII-XIX ғасырларға жататын қазақ рулық зираттары Көксу өзенінің сол жағалауынан тіркелді. Бұл жаңалықтардың барлығы биыл өткен 27 зерттеу экспедициясының нәтижесі болды, деп хабарлайды DKNews.kz.
Бұл туралы қор өкілдері Алматы қаласының өңірлік коммуникациялар қызметінде өткен баспасөз конференциясында мәлімдеді.
Суретті түсірген: Сергей Алексеенок
Олардың айтуынша, жоба аясында шалғай ауыл тұрғындарын Қазақстанның археологиялық мұрасын іздеуге және зерттеуге тарту бойынша үлкен жұмыс атқарылды. Әлеуметтік желілер мен БАҚ-тағы белсенді ақпараттандыру нәтижесінде еріктілерге әр аймақтан көптеген хабарламалар түскен.
Суретті түсірген: Сергей Алексеенок
Нәтижесінде археологтарға беймәлім бірқатар ескерткіштер зерттелді: Аманбөктер шоғыры, бұрын беймәлім болған Баянжүрек ауданында бір тобы. Сонымен қатар, Ақсу ауданы Қызылағаш ауылы маңындағы шатқалдан және Жетісу облысы, Көксу ауданы, Ақтекше ауылынын жанындағы Мұқыры шатқалынан суреттер табылды.
Суретті түсірген: Сергей Алексеенок
Қордың атқарушы директоры Ольга Гумирова былай деді: «“Петроглиф ізшілері” жобаларында пайдаланылатын ең басты ресурс – адам. Біздің қордың еріктілері тарихқа және Отанымыз Қазақстанға деген сүйіспеншілігі біріктірген түрлі мамандық иелерінен құралған 40-тан астам адам. Ең қуантатыны – жыл сайын іздеу жұмыстарына ауылдар мен шалғай елді мекендердің тұрғындары көбірек атсалыса бастады. Біз еліміздің түкпір-түкпірінен жаңа табылған жерлер туралы хабарламалар алып отырамыз. Адамдар өз туған жерінің тарихы бүкіл әлемге танылғанын қалайды. Бұл өз елінің, қаласының, ауылының тарихи-мәдени мұрасына деген шынайы сүйіспеншілікпен дәлелденген нағыз отансүйгіштіктің үлгісі».
Суретті түсірген: Сергей Алексеенок
Еріктілер тек зерттеумен ғана емес, тарихи-мәдени мұраны насихаттаумен де айналысады. 2025 жылы олар 8 ашық дәріс, 5 баспасөз туры және балаларға арналған 3 іс-шара ұйымдастырды.
«Қазақстан – петроглифтер елі» жобасының негізін қалаушылардың бірі және қор еріктісі Юрий Дороховтың айтуынша: «Елдің тарихи-мәдени мұрасын сақтаудағы маңызды бағыттардың бірі – оны халық арасында кеңінен насихаттау. Мен кәсіби PR-маман ретінде сенімдімін: Қазақстан тарихының баға жетпес қазыналары туралы көбірек адам хабардар болса, олардың арасында нағыз азаматтық жауапкершілігі жоғары тұлғалар көбейеді. Әсіресе бұл жас ұрпақ үшін аса өзекті».
Кездесу барысында спикерлер археологиялық ескерткіштерді сақтау бойынша қабылданып жатқан шаралар туралы айтып берді.
Суретті түсірген: Сергей Алексеенок
Қорытындысында келесі жылға арналған жоспарлар да жарияланды. 2026 жылы еріктілер жаңадан табылған шоғырларды зерттеуді жалғастырып, Ешкіөлмес кешенінің виртуалды 3D турын дайындау және жаңа барлау экспедицияларын ұйымдастыруды жоспарлап отыр.
