Атырау облысында «жасыл белдеуді» құрылыс алаңына айналдыруға бағытталған кезекті әрекет сәтсіз аяқталды, деп хабарлайды DKNews.kz.
Махамбет ауданында жоспарланған саябақ аумағын қорғап қалған прокуратураның араласуынан кейін бірқатар лауазымды тұлға тәртіптік жауапкершілікке тартылып, ауыл әкімі қызметінен босатылды.
Мәселе Махамбет ауылдық округінде полиция бөлімі мен әкімдікке арналған жаңа ғимарат салу жоспарына байланысты туындаған. Құрылыс үшін таңдалған жер – алдын ала бекітілген саябақ аймағы. Аудан прокуратурасының мәліметінше, ауыл әкімдігі бұл жоба үшін заң талаптары мен бас жоспарды елемей, шамамен 2 гектар аумақтағы жасыл желекті отап тастауға дайын болған.
Прокурорлық қадағалау нәтижесінде заңбұзушылықтар анықталып, тиісті акт енгізілді. Соның негізінде ауыл әкімінің қабылдаған шешімдерінің күші жойылды. Осылайша, өңірдің экожүйесі сақталып, ел көлемінде жүзеге асырылып жатқан «Таза Қазақстан» акциясының нақты маңызы тағы бір мәрте дәлелденді.
Заңсыз әрекеттерге жол бергендер жауапсыз қалған жоқ. Аудан әкімінің орынбасары, жер қатынастары және құрылыс бөлімдерінің басшылары, сондай-ақ «Азаматтарға арналған үкімет» КЕАҚ-тың Махамбет филиалының жетекшісі тәртіптік жауапкершілікке тартылды. Ал Махамбет ауылдық округінің әкімі атқаратын қызметінен босатылды.
Бұл жағдай қоғамда жиі көтерілетін бір өзекті мәселені тағы да алға шығарды: даму мен құрылыс экология есебінен жүзеге аспауы тиіс. Жасыл аймақтар – жай ғана бос жер емес, ауыл тұрғындарының тынығу орны, болашақ ұрпаққа қалатын табиғи мұра.
Сарапшылардың айтуынша, прокуратураның бұл қадамы жергілікті билікке нақты белгі: бас жоспар мен экологиялық талаптарды айналып өтуге жол жоқ. Ал тұрғындар үшін бұл – өз аумағындағы табиғатты қорғауға болатынын көрсеткен маңызды прецедент.
Жасыл желек сақталды. Заң үстемдігі тағы бір рет дәлелденді.
