Қазақстанда жүргізіліп жатқан реформалардың мәні тек басқару жүйесін өзгерту емес. Басты мақсат - мемлекеттің шешім қабылдау тәсілін жаңартып, оны қоғаммен және болашақпен тығыз байланысты ету. Осы тұрғыда Қазақстан Республикасы Парламенті Мәжілісінің депутаты Бақтықожа Ізмұхамбетов Құрылтай мен Халық Кеңесінің рөліне және преамбулада бекітілуі тиіс негізгі қағидаттарға тоқталды, деп хабарлайды DKNews.kz.
Болашақ ұрпақ алдындағы жауапкершілік - стратегиялық ұстаным
Депутаттың айтуынша, преамбула мәтінінде көрініс табуы тиіс басты ұсыныстардың бірі - болашақ ұрпақ алдындағы жауапкершілік пен оның мүддесін қорғауға қатысты арнайы норма.
«Болашақ ұрпақ алдындағы жауапкершілік – мемлекеттік саясаттың негізгі тірек қағидаттарының бірі. Бұл қағидат экологиялық саясатты қалыптастыруда, бюджеттік жоспарлауда, табиғи ресурстарды ұтымды әрі үнемді пайдалануда, ұлттық байлықты сақтауда басты бағдар болуы қажет. Бұл ұстаным мемлекеттік басқарудың көз алдағы мүдделерге емес, елдің тұрақты әрі орнықты дамуына бағытталуын қамтамасыз етеді. Сондай-ақ, ол мемлекеттің әлеуметтік жауапкершілігімен, қоршаған ортаны қорғау міндетімен және ұлттық қауіпсіздікті нығайту мақсатымен өзара тығыз байланысты. Сондықтан, бұл норманы бекіту – жай декларативті ұстаным емес, мемлекеттік саясаттың нақты стратегиялық бағытын айқындайтын маңызды қағида болуға тиіс», – деді ол.
Бұл жерде әңгіме абстрактілі идея туралы емес. Мәселе экологиядан бастап, бюджет қаржысының қалай жұмсалатынына дейінгі нақты шешімдерге әсер ететін қағидат жөнінде болып отыр. Яғни, мемлекет қысқа мерзімді пайдаға емес, елдің ұзақ мерзімді дамуына жұмыс істеуі тиіс.
Құрылтай мен Халық Кеңесі - бір мақсат, екі түрлі тетік
Ізмұхамбетов реформаның тағы бір маңызды бағыты ретінде Құрылтай мен Халық Кеңесінің конституциялық мәртебесі мен функционалын атап өтті. Оның айтуынша, бұл екі институт бірін-бірі алмастырмайды, керісінше, өзара толықтырады.
«Құрылтай мен Халық Кеңесінің жұмысы мазмұндық жақтан үндесіп, бірін-бірі толықтырып, жетілдіріп отырады. Осылайша “Халық үніне құлақ асатын мемлекет” тұжырымдамасын толыққанды жүзеге асыра аламыз. Халық Кеңесінің артықшылығы – оның кең өкілеттігінде. Демек, Халық Кеңесі – кеңесші орган ғана емес, халықтың ойы айтылатын, ұсынысы жеткізілетін, азаматтық ұстанымы ескерілетін алаңға айналады», – деп ақтады Мәжіліс депутаты.
Осылайша, Құрылтай қоғамдық пікірдің кең ауқымды стратегиялық бағытын айқындауға мүмкіндік берсе, Халық Кеңесі күнделікті мәселелер бойынша азаматтардың үнін тікелей жеткізетін құралға айналмақ.
Мемлекет пен қоғам арасындағы жаңа формат
Мәжіліс депутатының сөзінен түйетін басты ой - Құрылтай мен Халық Кеңесі формалды құрылым ретінде емес, қоғам мен билік арасындағы тірі диалог алаңы ретінде қарастырылып отыр. Ал болашақ ұрпақ алдындағы жауапкершілік қағидаты осы диалогтың мазмұнын ұзақ мерзімге бағыттауға тиіс.
Бұл реформалардың түпкі мәні де осында - бүгінгі шешімдердің ертеңгі ел тағдырына қалай әсер ететінін ескеретін басқару моделін қалыптастыру.
