Онлайн-казино, криптовалюта және лицензия артындағы схема. Қазақстанда заңсыз ойын бизнесі қалай жасырылды, деп хабарлайды DKNews.kz.
Қазақстанда заңсыз онлайн-казино ісіне қатысты ірі іс әшкереленді. Қаржылық мониторинг агенттігі халықаралық іздеуге екі адамды жариялады – АҚШ азаматы Дмитры Дружинскы және Украина азаматы Марина Левкович (Гинзбург).
Сот оларды сырттай қамауға алу туралы санкция берді.
Тергеу деректері бұл істің жай ғана заң бұзушылық емес, шетелден басқарылған, бірнеше деңгейлі қаржылық жүйеге сүйенген күрделі схема екенін көрсетіп отыр.
Онлайн-казино қалай жұмыс істеген
Құқық қорғау органдарының мәліметінше, «PIN-UP» және «PINCO» брендтерімен белгілі онлайн-казино қызметі Қазақстан аумағында тікелей емес, шетелде отырған тұлғалар арқылы басқарылған. Олар байланысы бар компаниялар желісін пайдаланып, ойын бизнесін заңсыз түрде жүргізген.
Координатор ретінде әрекет еткен Дружинскы мен Левкович сыбайластарды іріктеумен, төлем жүйелерімен және екінші деңгейлі банктермен байланыс орнатумен айналысқан. Негізгі міндет – ойыншылардан түскен ақшаның үздіксіз қабылданып, кедергісіз шығарылуын қамтамасыз ету болған.
Лицензия – бүркемелеу құралы
Схеманың ең маңызды тұстарының бірі – заңсыз қызметті жасыру тәсілі. Ол үшін «Бонами» ЖШС құрылып, «PIN-UP.KZ» брендімен букмекерлік қызметке мемлекеттік лицензия алынған.
Сырт көзге бұл – заңды букмекерлік компания. Алайда тергеу нұсқасына сәйкес, лицензия онлайн-казино қызметін бүркемелеу үшін пайдаланылған. Яғни ресми рұқсат заңсыз ойын бизнесінің қалқанына айналған.
Ақша қайда кеткен
Қаржылық ағындарды басқару үшін арнайы төлем ұйымдарының желісі құрылған. Олардың қатарында «Gold Pay» ЖШС мен «Cyber Pay» ЖШС (кейін «Pinnacle Financial Solutions» деп өзгертілген) болған. Бұл компаниялар онлайн-казино үшін төлем агрегаторы қызметін атқарған.
Ойыншылар салған қаражат алдымен транзиттік шоттарда жинақталып, кейін электрондық ақша операцияларына лицензиясы бар байланысы компаниялар арқылы криптовалютаға айырбасталған. Тергеушілердің пікірінше, бұл тәсіл ақша қозғалысын жасырып, нақты пайда алушыларды анықтауды қиындатқан.
Неліктен бұл іс маңызды
Сарапшылар бұл жағдай Қазақстанда заңсыз ойын бизнесінің қалай эволюцияға ұшырағанын көрсетеді дейді. Лицензияланған компаниялар, күрделі төлем тетіктері және криптовалюта – бәрі де құқық қорғау органдарынан жасырынып, ұзақ уақыт бойы жұмыс істеуге мүмкіндік берген.
Мұндай схемалар тек қаржы саласына емес, азаматтардың қауіпсіздігіне де тікелей әсер етеді. Онлайн-казино арқылы мыңдаған адам қаржылық тәуекелге ұрынып, мемлекет салық пен бақылаудан тыс қалған айналымға тап болады.
Агенттік азаматтарға үндеу жасады
Қаржылық мониторинг агенттігі іздеуде жүрген тұлғалардың қайда жүргені туралы қандай да бір ақпарат болса, кезекші бөлімге хабарласуды сұрайды: +7 7172 70 84 78
Тергеу жалғасып жатыр. Бұл іс Қазақстанда заңсыз ойын бизнесіне қарсы күрестің жаңа кезеңін бастауы мүмкін. Енді тек сайттарды бұғаттау емес, қаржы тізбегін толық үзіп, шынайы ұйымдастырушыларға дейін жету басты мақсат болып отыр.
