Қазақ мемлекеттік циркі Алматыда халықаралық гастрольдік жобаны ұсынып, әртістерінің әлемдік аренадағы жарқын жетістіктерін жариялады. Өңірлік коммуникациялар қызметінде өткен баспасөз конференциясында цирк басшылығы италиялық Belissimo бағдарламасының гастрольі басталғанын хабарлады, деп хабарлайды DKNews.kz.
Сонымен қатар алматылық әртістер Ташкентте өткен халықаралық фестивальден алтын және күміс жүлдемен оралғанын мәлімдеді.
Италиялық Belissimo шоуы көрерменді таңғалдырмақ
Әлемге танымал әртістер Флавио мен Бруно Тони жетекшілік ететін Италия циркінің Belissimo бағдарламасы Алматыға арнайы гастрольдік сапармен келді. Шоу техниканы, талғампаздықты, әзілді және италиялық темпераментті үйлестіруімен ерекшеленеді.
Цирк директоры Мақсат Жайықов бағдарламаның мазмұны туралы айтты.
«Алматы циркінің манежінде бенгал мен ақ жолбарыстар, сондай-ақ Орталық Азияда алғаш рет бірегей алтын жолбарыстар өнер көрсетеді осы жолы. Бағдарламада үш мәрте сальто-мортале жасайтын акробаттар, эквилибристер, жонглерлер мен арқан бойымен жүретін әртістер, әсем жылқы нөмірлері, нәзік италиялық әзілге құрылған клоунада, қарқынды музыка мен әсерлі визуалды шешімдер бар».
Әлемдік деңгейдегі цирк әулеті
Флавио мен Бруно Тони – әйгілі цирк әулетінің өкілдері. Олар Monte-Carlo International Circus Festival фестивалінде бірнеше мәрте марапат алған. Бағдарламалары отбасылық аудиторияға арналған. Балаларға қызық. Ересектерге әсерлі.
Флавио Тони Алматыға арнайы келу себебін түсіндірді.
«Біз бұл әсем қалаға арнайы келдік, себебі Еуропада Алматының циркі туралы көп естідік. Оны мықты әрі беделді сахна санайды, сондықтан осында жұмыс істеп көргіміз келді».
Алғашқы қойылымдардан кейін таңдау дұрыс болғанына көз жеткізген.
«Өткен демалыс күндері алғашқы шоулар өтті, біз залдың қалай қабылдағанын көрдік сонда. Көрермендерге бағдарлама шынымен ұнады, бізге де ең керегі осы болатын».
Жолбарыстармен өнер көрсететін шебер
Бруно Тони жануарлармен 13 жасынан жұмыс істейді. Қазір ол 11 жолбарыстан тұратын топпен өнер көрсетеді.
«Көрермен циркке келген кезде, уайым-қайғысын ұмытқысы келеді. Біз солардың көңілінен шығуға тырысамыз. Сосын біз балалармен ғана емес, ересектер үшін де жұмыс істейміз, өйткені әр ересектің ішінде бір-бір бала жасырынып жатыр».
Қазақстандық әртістердің халықаралық жеңісі
Гастрольдермен қатар Қазақ мемлекеттік циркінің әртістері II International Youth Festival of Circus Art Silk Road фестивалінде үлкен табысқа жетті.
Алтын медаль «Әуе сферасы» нөмірі үшін Жасмин Алшынбаева мен Авелина Гузейге берілді. Күміс жүлде «Доптарды еденге соғып жонглерлеу» нөмірі үшін Салаватов Алиге табысталды.
Мақсат Жайықов фестивальдің маңызды нәтижесін атап өтті.
«Фестиваль аясында Өзбекстен мен Қазақстанның мемлекеттік циркі ынтымақтастық туралы меморандумға қол қойды. Құжат бірлескен жобаларды дамытып, әртістер алмасып, қойылым қойып, халықаралық бағдарламаларға қатысуды көздейді».
Халықаралық деңгейдегі мәдени мүмкіндік
Belissimo шоуының гастрольі 14 ақпанда басталды. Ол 24 наурызға дейін жалғасады. Бұл – көрермендер үшін әлемдік деңгейдегі еуропалық цирк өнерімен танысудың ерекше мүмкіндігі.
Сарапшылардың айтуынша, халықаралық жобалар қазақстандық цирк мектебінің беделін арттырып, мәдени байланыстарды нығайта түседі.
