Алматы әкімінің орынбасары Бейбіт Шаханов қала тұрғындарын жеке мәселелері бойынша қабылдады. Кездесу барысында жер қатынастары мен құрылыс талаптарының сақталуына қатысты бірқатар мәселелер талқыланды, деп хабарлайды DKNews.kz.
Қабылдауға келген Абай шағынауданының тұрғындары қаланың Бас жоспарына енгізілген өзгерістерге байланысты өз ұсыныстарын білдірді.
Тұрғындар жердің мәртебесін өзгертуді сұрады
Қолданыстағы Бас жоспарға сәйкес, аталған аумақта қоғамдық-іскерлік аймақ, көпқабатты тұрғын үй құрылысы және саябақ аймағын орналастыру көзделген.
Ал қазіргі уақытта бұл жер телімдерінің нысаналы мақсаты бау-бақша шаруашылығы болып табылады.
Осыған байланысты тұрғындар аумақтың функционалдық мәртебесін жеке тұрғын үй құрылысы аймағына өзгерту мүмкіндігін қарастыруды сұрады.
Бас жоспар – қаланың стратегиялық құжаты
Алматы әкімінің орынбасары Бас жоспар қаланың ұзақ мерзімді дамуын айқындайтын негізгі стратегиялық құжат екенін атап өтті.
Оның айтуынша, мұндай құжат әзірленген кезде тек қазіргі құрылыс жағдайы ғана емес, сонымен қатар болашақта халықтың қажеттілігі мен қаланың даму перспективасы да ескеріледі.
Сарапшылар кешенді даму қажеттігін айтты
Өз кезегінде еліміздің құрметті сәулетшісі Жанат Айтілеу бұған дейін басқа бау-бақша серіктестіктеріне қатысты ұқсас жағдайды түсіндіріп, Бас жоспарда қарастырылған шешімдер аумақты кешенді түрде дамытуға бағытталғанын атап өткен.
Оның айтуынша, мұндай тәсіл заманауи қалалық ортаны қалыптастыруға мүмкіндік береді, сондай-ақ әлеуметтік инфрақұрылымды дамытуға, көлік қолжетімділігін арттыруға және тұрғындардың өмір сүру сапасын жақсартуға жағдай жасайды.
«Абай шағынауданының бүкіл аумағын тек жеке тұрғын үй құрылысы аймағына ауыстыру жер ресурстарын тиімсіз пайдалануға алып келуі және қаланың даму мүмкіндігін шектеуі мүмкін», — деді сәулетші.
Жер құны аймақ мәртебесіне де байланысты
«SENIM» кәсіби бағалау орталығы» ЖШС тәуелсіз бағалау компаниясының мәліметінше, жер телімдерін жеке инвесторлар сатып алған жағдайда олардың тартымдылығы көбіне Бас жоспарда көрсетілген аумақтың аймақтық мәртебесіне байланысты анықталады.
Ал жердің нысаналы мақсаты шешуші фактор бола бермейді.
Мамандардың айтуынша, әдетте жердің бағасы оның аумағына және ондағы құрылыстардың көлеміне қарай қалыптасады, ал жалпы меншік құны инвестор мен жер телімінің иесі арасындағы жеке келісім арқылы анықталады.
