Алматы халықаралық әуежайында кеден қызметкерлері Үндістаннан келген дәрі-дәрмектің ірі партиясын анықтады. Тауар косметикалық өнім ретінде жасырылғаны белгілі болды, деп хабарлады Алматы қаласы Мемлекеттік кірістер департаментінің баспасөз қызметі, деп хабарлайды DKNews.kz.
Дәрі-дәрмек қалай жасырылған
Ілеспе құжаттарға сәйкес, өнімдер косметикалық құрал ретінде көрсетілген. Алайда кедендік бақылау кезінде жалпы салмағы 1 324 килограмм болатын 39 түрлі дәрілік препарат әкелінгені анықталды. Алдын ала есептеулер бойынша, тауардың кедендік құны 5 миллион теңгеден асады.
Құқықтық жауапкершілік
- ҚР Әкімшілік құқық бұзушылық туралы кодекстің 551-бабына сәйкес, тауарларды декларацияламаған немесе дұрыс декларацияламаған тұлғаларға тауар құнының 25%-ы көлемінде айыппұл салынады.
- ҚР ӘҚБтК-нің 545-бабына сәйкес, Еуразиялық экономикалық одақ шекарасы арқылы тауарларды заңсыз өткізу айыппұлға әкеп соғады. Айыппұл мөлшері субъектінің санатына байланысты 15-тен 50 айлық есептік көрсеткішке дейінгі (АЕК) көлемде белгіленеді.
Бұған дейінгі фактілер
Жыл басынан бері Алматы қаласында МКД заңсыз өткізілген есірткі заттары бар тауарлардың 17 фактісі тіркелген, олардың жалпы салмағы 25,84 килограммды құраған.
Қазіргі жағдай
Қазіргі уақытта уәкілетті органдар тексеру жүргізіп жатыр. Барлық материалдар құқық қорғау органдарына процессуалдық шешім қабылдау үшін тапсырылды, ал кінәлі тұлғаларға қатысты заң аясында шаралар қолданылатын болады.
