Қазақстан Республикасының Премьер-министрі Олжас Бектеновтің Қытай Халық Республикасына жұмыс сапары аясында ҚХР Мемлекеттік кеңесінің Премьері Ли Цянмен кездесуі өтті, деп хабарлайды DKNews.kz.
Тараптар жоғары деңгейде қол жеткізілген келісімдердің іске асырылу барысын талқылап, сауда, инвестиция, агроөнеркәсіп кешені, көлік-логистика және өзге де салалардағы ынтымақтастықты кеңейту мәселелерін қарастырды.
Қазақстан мен Қытай стратегиялық серіктестікті нығайтуда
Кездесу барысында Олжас Бектенов Қазақстан жаңа даму кезеңіне қадам басқанын атап өтті.
Оның айтуынша, жалпыхалықтық референдум нәтижесінде қабылданған Конституцияда Мемлекет басшысы Қасым-Жомарт Тоқаевтың Әділетті әрі Прогрессивті Қазақстан құруға бағытталған бастамалары көрініс тапқан.
«Қазақстан мен Қытайды өзара құрмет пен қолдауға негізделген достық және ынтымақтастық байланыстырады. Бүгінде екіжақты қатынастар мәңгілік әрі жан-жақты стратегиялық серіктестік рухында дамып, жаңа «алтын отызжылдық» кезеңіне қадам басты. Мемлекеттеріміздің көшбасшылары Қасым-Жомарт Кемелұлы Тоқаев пен Си Цзиньпин арасындағы берік сенімге негізделген сындарлы диалог серіктестіктің үлгілі моделіне айналған мемлекетаралық қатынастардың орнықты дамуының негізгі қозғаушы күші болып отыр», — деді Олжас Бектенов.
Ли Цян: Қазақстан мен Қытай арасындағы байланыс тереңдей түсуде
Қытай Мемлекеттік кеңесінің Премьері Ли Цян екі ел арасындағы стратегиялық әріптестіктің жоғары деңгейде екенін айтты.
«Кейінгі жылдары екі ел арасында жоғары деңгейде тығыз байланыс орнады, ҚХР Төрағасы Си Цзиньпин мен Қазақстан Президенті Қасым-Жомарт Тоқаев жыл сайын кездеседі. Бүгінде Қазақстан мен Қытай арасындағы жан-жақты стратегиялық серіктестік өзара қолдау мен тату көршілік үлгісіне айналып, ұдайы тереңдей түсуде. Қазіргі халықаралық жағдайда екі ел сенімді серіктестер ретінде ортақ дамудың игілігі жолында бірлесіп жұмыс істеу үшін өзара үйлестіруді нығайтуы қажет. Қытай тарапы саяси өзара сенімді нығайтуға, даму стратегияларын үйлестіруге және екі ел халқының игілігі үшін көпқырлы ынтымақтастықты кеңейтуге бағытталған бірлескен жұмысты жалғастыруға дайын», — деп атап өтті Ли Цян.
Сауда айналымы 48 млрд доллардан асты
Қытай Қазақстанның ең ірі сауда және инвестициялық серіктестерінің бірі болып қала береді.
2025 жылдың қорытындысы бойынша:
- екіжақты сауда көлемі 48 млрд доллардан асты;
- Қытайдан тартылған тікелей инвестиция көлемі 2,8 млрд долларды құрады.
Агроөнеркәсіп кешеніндегі ынтымақтастық та қарқынды дамып келеді.
Өткен жылы:
- АӨК саласындағы тауар айналымы 36 пайызға өсті;
- көлемі 1,9 млрд доллардан асты.
Қазақстан Қытай мен Еуропа арасындағы негізгі транзиттік көпірге айналды
Көлік-логистика саласы екіжақты әріптестіктің маңызды бағыттарының бірі болып отыр.
Қазіргі таңда Қытай мен Еуропа арасындағы құрлық жүк тасымалының 85 пайыздан астамы Қазақстан аумағы арқылы өтеді.
2025 жылы:
- Қазақстан мен Қытай арасындағы теміржол тасымалы 11 пайызға өсті;
- жүк көлемі 35,6 млн тоннаға жетті.
«Бір белдеу, бір жол» бастамасының жаңа кезеңі
Далянь қаласында Олжас Бектенов «Бір белдеу, бір жол» бастамасына арналған халықаралық сессияға қатысты.
Премьер-министр Қазақстанның Еуразияның дәл ортасында орналасқанын және шамамен 1,7 млрд тұтынушысы бар нарықтарға шығуға мүмкіндік беретінін атап өтті.
Соңғы жеті жылда көлік-транзит инфрақұрылымын дамытуға:
- 35 млрд доллардан астам инвестиция салынды;
- Ақтау контейнерлік хабы іске қосылды;
- Сиань құрғақ порты дамытылды;
- «Достық – Мойынты» теміржолының екінші жолдары салынды.
Келесі қадам қандай?
Қазақстан «Бір белдеу, бір жол» бастамасын дамыту аясында бес негізгі бағытқа басымдық беріп отыр:
- инфрақұрылымдық өзара байланысты күшейту;
- цифрлық орта дәлізді қалыптастыру;
- жасыл күн тәртібін ілгерілету;
- сауда байланыстарын кеңейту;
- инвестициялық және қаржылық тетіктерді дамыту.
«"Бір белдеу, бір жол" бастамасы өзара байланыстардың кеңеюі жаңа мүмкіндіктерге жол ашатынын айқын көрсетті. Бүгінде Қазақстан мен Қытай осының жарқын мысалы болып отыр. Жібек жолы әрдайым ашықтық, сенім және күш-жігер біріктіруге дайын болудың арқасында өркендеп келеді. Қазақстан осы қағидаттарға берік. Біз өзімізді Қытайдың сенімді серіктесі әрі өңірлерді байланыстыратын маңызды көпір ретінде көреміз. Сонымен қатар осы көзқарасты бөлісетін барлық серіктеспен өзара тиімді әрі ауқымды жобаларды жүзеге асыруға ашықпыз. Түптеп келгенде, өзара байланыс инфрақұрылым ғана емес, бұл – адамдардың әл-ауқаты мен ортақ прогресс», — деді Олжас Бектенов.
