Алматы тағы да үлкен өзгерістің алдында тұр.
Бұл жолы әңгіме тек жаңа туристік нысан туралы емес. Қала маңындағы тауларды толыққанды халықаралық демалыс орталығына айналдыру жоспары қызу талқыланып жатыр, деп хабарлайды DKNews.kz.
Сарапшылардың айтуынша, егер жоба жүзеге асса, Алматы Орталық Азиядағы ең ірі тау туризмі орталықтарының біріне айналуы мүмкін.
Жуырда «Алматыбасжоспары» алаңында өткен кеңесте елдегі ең ауқымды туристік бастамалардың бірі – Алматы тау кластері мен «Almaty Superski» жобасының болашағы талқыланды. Кездесуді «Атамекен» ұлттық кәсіпкерлер палатасы ұйымдастырды. Оған мемлекеттік органдар, туризм саласының өкілдері, бизнес қауымдастықтар мен сарапшылар қатысты.
Алматы неге дәл қазір тау туризміне ден қойып отыр?
Соңғы жылдары әлемде тау туризмі қарқынды дамып келеді. Адамдар классикалық жағажай демалысынан гөрі табиғатқа жақын, белсенді саяхат түрлерін көбірек таңдай бастады. Оның үстіне, көрші Қырғызстан мен Өзбекстан да тау инфрақұрылымына миллиардтаған инвестиция құйып жатыр.
Алматының басты артықшылығы – таулардың қалаға тым жақын орналасуы. Әлемде мегаполистен 30-40 минутта шаңғы курортына жетуге болатын орындар өте аз. Осы мүмкіндікті пайдалану енді мемлекеттік деңгейде қолға алынбақ.
«Атамекен» ҰКП төралқа төрағасы Қанат Шарлапаев бұл жобаны жай ғана курорт салу емес, жаңа экономикалық модель құру деп атады.
Оның айтуынша, Алматы туризм, кәсіпкерлік және қызмет көрсету саласының драйверіне айналуы тиіс.
«Almaty Superski» қандай жоба?
Ұсынылған жоспарларға қарағанда, жоба көлемі расымен де ауқымды.
Басты цифрлар:
- 1022 гектар аумақ игеріледі;
- 17 аспалы көтергіш салынады;
- 60 шақырымнан астам шаңғы трассасы жасалады;
- 20 гектарлық заманауи тау ауылы бой көтереді.
Ал жалпы Алматы тау кластері аясында:
- 30-ға дейін аспалы жол салу;
- 151 шақырым шаңғы трассасын дамыту;
- тәулігіне 30 мың турист қабылдау жоспарда бар.
Яғни сөз тек қысқы демалыс туралы емес. Жоба жыл бойы жұмыс істейтін туристік экожүйе ретінде қарастырылып отыр.
Тек шаңғы емес: Алматы тауларында не өзгереді?
Жоба әзірлеушілері туризмнің жаңа форматына басымдық беріп отыр. Бұл дегеніміз:
- хайкинг бағыттары;
- веложолдар;
- маунтинбайк трассалары;
- визит-орталықтар;
- қауіпсіздік жүйелері;
- экологиялық бақылау.
Қазір Алматы тауларына демалуға шығатын адамдар саны жыл сайын артып келеді. Бірақ инфрақұрылымның жетіспеуі, тұрақ мәселесі, қоқыс, қауіпсіздік пен ретсіз туристік ағын экологияға да, адамдарға да қиындық тудырып отыр.
Жоба авторларының айтуынша, жаңа жүйе дәл осы мәселелерді шешуге бағытталған.
Экология мәселесі қалай шешіледі?
Тауға құрылыс салу тақырыбы қоғамда әрдайым қызу пікірталас тудырады. Бұл жолы да солай.
Жоба таныстырылымында экологтар, гидрологтар, зоологтар және табиғатты қорғау саласының сарапшыларымен бірлескен жұмыстар жүргізіліп жатқаны айтылды.
Негізгі идея – адамдарды табиғаттан алыстату емес, керісінше туристік ағынды реттеу.
Мысалы:
- бақылаусыз соқпақтардың орнына арнайы маршруттар;
- жүйелі инфрақұрылым;
- қоқыс пен көлік қозғалысын бақылау;
- қауіпсіздік пен құтқару қызметтерін күшейту қарастырылған.
Сарапшылардың бір бөлігі ұйымдастырылған туризм табиғатқа түсетін қысымды азайтады деп есептейді. Алайда қоғамдық талқылаулар әлі де жалғасатыны анық.
Алматы экономикасына қандай пайдасы болуы мүмкін?
Ең қызығы – жобаның экономикалық әсері.
Болжам бойынша, 2028 жылға қарай:
- ішкі туристер саны 1,7 миллионнан 3,4 миллионға дейін өседі;
- шетелдік туристер саны 600 мыңнан 2,5 миллион адамға жетуі мүмкін.
Ал туризм саласындағы жұмыс орындары 119 мың адамға дейін көбейеді деген болжам бар.
Бұл қонақүй, кафе, мейрамхана, гид қызметі, тасымал, IT-сервис, жалға беру нарығы сияқты ондаған саланың дамуына ықпал етуі мүмкін.
Kazakh Tourism Development басшысы Ержан Еркінбаев «Almaty Superski» жобасын Қазақстан үшін жаңа халықаралық бренд қалыптастыратын бастама деп атады.
Оның айтуынша, Алматы Орталық Азиядағы тау туризмінің басты орталығына айнала алады.
Алматы Швейцарияға ұқсай ала ма?
Бұл сұрақ қазір әлеуметтік желілерде де жиі талқыланып жүр.
Әрине, Алматыны бір күнде Альпіге айналдыру мүмкін емес. Бірақ сарапшылардың айтуынша, табиғи әлеует жағынан қала көптеген әлемдік курорттардан кем түспейді.
Мәселе – инфрақұрылым мен сервисте.
Егер жоспарланған жобалар толық іске асса, Алматы:
- халықаралық жарыстар өткізе алатын;
- шетелдік туристер ағылатын;
- жыл бойы жұмыс істейтін;
- ірі инвестиция тартатын туристік орталыққа айналуы мүмкін.
Бірақ мұның бәрі бір ғана шартқа байланысты — даму мен табиғат арасындағы тепе-теңдік сақталуы керек.
Қазір қоғамды алаңдатып отырған негізгі сұрақ та осы.
