Ғылым және жоғары білім вице-министрі Гүлзат Көбенова Үкімет отырысында азаматтық авиация саласы үшін кадрлар даярлау бағытында атқарылып жатқан жұмыстар туралы баяндады, деп хабарлайды DKNews.kz.
Оның айтуынша, Мемлекет басшысының 2025 жылғы 3 желтоқсанда авиахабтарды дамыту жөнінде берген тапсырмасына сәйкес, Қазақстанда авиациялық кадрларды даярлау жүйесін жаңғырту жұмыстары күшейтілген.
Гранттар саны бірнеше есе өсті
Қазіргі уақытта азаматтық авиация саласына мамандарды Азаматтық авиация академиясы даярлап жатыр.
Вице-министр соңғы жылдары мемлекеттік гранттар саны айтарлықтай артқанын айтты.
«Мемлекет тарапынан қабылданып жатқан шаралардың нәтижесінде студенттер контингенті де өсуде. Соңғы төрт жылда өсім 72 пайыздан асты. Авиация саласындағы мамандарға сұранысты ескере отырып, соңғы жылдары мемлекеттік гранттар саны айтарлықтай артты. Егер 2022–2023 оқу жылында 180 грант бөлінсе, 2025–2026 оқу жылына 618 грант бөлінді. Түлектерді жұмысқа орналастыру көрсеткіші де жоғары. Қазіргі таңда ол 90%-ға жетіп отыр. Түлектер әуежайларда, авиакомпанияларда, логистикалық және аэронавигациялық ұйымдарда еңбек етуде»
Академияда жасанды интеллект енгізіліп жатыр
Гүлзат Көбенованың айтуынша, оқу процесіне цифрлық технологиялар мен жасанды интеллект элементтері белсенді енгізілуде.
AI-SANA бағдарламасы аясында:
- мыңнан астам студент цифрлық құзыреттерді меңгерген
- 2 мыңнан астам білім алушы Coursera платформасында білім алған
Қандай мамандар даярланады
Оқыту 17 білім беру бағдарламасы негізінде жүргізіледі.
Академия:
- ұшқыштарды
- диспетчерлерді
- инженерлік-техникалық мамандарды
- авиациялық қауіпсіздік қызметкерлерін
- ұшқышсыз авиациялық жүйелер мамандарын даярлайды
Бағдарламалар:
- жұмыс берушілермен бірге әзірленген
- 25 кәсіптік стандартқа негізделген
Сонымен қатар 2040 жылға дейінгі жаңа мамандықтар атласы жасалған.
Қазақстан АҚШ университетімен серіктестікті күшейтті
Авиация саласында халықаралық ынтымақтастық та кеңейіп келеді.
Қазіргі таңда Академия:
- 22 шетелдік жоғары оқу орнымен байланыс орнатқан
Негізгі стратегиялық серіктес ретінде АҚШ-тағы Kent State University аталды.
Бұл университет:
- United Airlines компаниясына кадр даярлайтын негізгі оқу орындарының бірі саналады
Заманауи ұшақтар мен тренажерлар қолданылуда
Вице-министрдің айтуынша, материалдық-техникалық база да кезең-кезеңімен жаңартылып жатыр.
Қазіргі уақытта Академияда:
- заманауи оқу ұшақтары
- Boeing және Airbus тренажерлары қолданылады
Сонымен қатар:
- ICAO AVSEC субөңірлік оқу орталығы жұмыс істейді
Бұл – Халықаралық азаматтық авиация ұйымы жүйесіндегі әлемдегі 36 орталықтың бірі.
Қазақстан халықаралық сертификаттауға дайындалып жатыр
Академия Еуропалық авиациялық қауіпсіздік агенттігінің стандарттарын кезең-кезеңімен енгізуде.
2026 жылы:
- EASA Part-147 халықаралық сертификаттауына өтінім беру жоспарланған
«Бұл үшін 4 жыл ішінде (2021–2025 жылдары) 5 ұшқыш-нұсқаушы (Испанияда) даярланды, инженерлік бағыттағы 17 оқытушы оқудан өтті (Латвияда), сондай-ақ авиапарк пен тренажерлық база жаңартылуда. Кадрларды даярлау әдіснамасын ICAO стандарттарына сәйкестендіру, сондай-ақ халықаралық оқу материалдары мен білім беру ресурстарына қолжетімділікті қамтамасыз ету үшін Академия 2019 жылдан бастап ALICANTO жаһандық авиациялық университеттер желісінің қауымдасқан мүшесі, ал 2024 жылдан бастап ICAO TRAINAIR PLUS бағдарламасының мүшесі болып саналады»
Авиациялық зерттеу институты құрылуы мүмкін
Ғылыми-зерттеу бағыты да белсенді дамып жатыр.
Соңғы жылдары:
- авиация саласында 45 ғылыми жоба жүзеге асырылған
- ғылыми зертханалар ашылған
Қазақстан:
- Қытай
- Түркия
- Әзербайжан
ғылыми орталықтарымен бірлескен жобаларды іске асырып жатыр.
Сонымен қатар Мемлекет басшысының тапсырмасы аясында:
- Авиациялық зерттеулер ғылыми-зерттеу институтын құру жоспарлануда
ҒЗИ жұмысы:
- авиациялық қауіпсіздікке
- цифрландыруға
- жасанды интеллектке
- ұшқышсыз авиациялық жүйелерге
- экологиялық тұрақты авиацияға бағытталмақ
