Бір күнде 140 көшет егілді. Астанада «Таза Қазақстан» акциясы аясында ардагерлер, студенттер, кәсіпкерлер мен әкімдік қызметкерлері Абай даңғылын көгалдандыруға шықты, деп хабарлайды DKNews.kz.
Акцияның ерекшелігі — оған бірнеше буын өкілдері қатар қатысты. Астана медицина университетінің 120-ға жуық студентімен бірге Белсенді ұзақ өмір сүру орталығының зейнеткерлері мен жасы 90-ға таяған ардагерлер де ағаш отырғызды.
120-ға жуық студент көгалдандыруға қатысты
Абай даңғылы бойындағы акция «Таза Қазақстан» аясындағы күзгі көгалдандыру жұмыстарының бір бөлігі болды.
140 ағаш көшетін отырғызуға жастар, ардагерлер, зейнеткерлер, кәсіпкерлер және қала әкімдігінің қызметкерлері жұмылдырылды.
Жастардың экологиялық жобаларға қатысуы елордада басқа бағдарламалар арқылы да жалғасып келеді. Мәселен, биылғы «JASYL EL» бағдарламасына 5200-ден астам оқушы мен студентті тарту жоспарланған. Оның қатысушылары қаланы абаттандыру, көгалдандыру және жасыл желектерді күтіп-баптау жұмыстарына қатысады.
Жасы 90-ға таяған ардагерлер де ағаш екті
Байқоңыр ауданы Белсенді ұзақ өмір сүру орталығының мүшесі Маржан Пірімбетованың айтуынша, орталықтағы зейнеткерлер экологиялық бастамаларға тұрақты қатысады.
«Бүгін Байқоңыр аудандық әкімдігінің қолдауымен ұйымдастырылған игі экологиялық бастамаға қатысып, көшет егуге келдік. Абай даңғылының бойын абаттандыруға, қаланың тазалығы мен көркеюіне өз үлесімізді қосу – баршамызға ортақ міндет деп санаймын. Біз «Таза Қазақстан» экологиялық акциясын әрдайым қолдаймыз. Орталығымыздың зейнеткерлері жыл сайын осындай қоғамдық және экологиялық жұмыстарға белсенді түрде қатысып келеді», – деді ол.
Байқоңыр ауданы Ардагерлер кеңесінің мүшесі Жомарт Дәуменов акцияға жасы 90-ға таяған тұрғындардың да келгенін айтты.
«Бүгінгі экологиялық акцияға ардагерлер де белсене қатысып жатыр. Арамызда жасы 90-ға таяған қарияларымыз бар, ең кішілерінің өзі 70 жастан асты. Соған қарамастан олар қаланың көркеюі мен гүлденуіне өз үлестерін қосу үшін арнайы келіп отыр. Бұл – біздің тұрған жеріміз, туған мекеніміз. Сондықтан қаламыз әрдайым таза, көрікті әрі жайнап тұруы керек», – деді Жомарт Дәуменов.
Байқоңыр ауданында көгалдандыру бірнеше жылдан бері жүріп жатыр
Абай даңғылындағы 140 көшет — аудандағы жеке акция емес. Байқоңырда «Таза Қазақстан» аясында ағаш отырғызу жұмыстары бұған дейін де бірнеше аумақта жүргізілген.
2025 жылдың көктемінде Тәшенов көшесі мен Есіл жағалауы маңындағы үш гектарға жуық аумаққа 500-ге жуық ағаш отырғызылған. Олардың арасында шырша, қарағай, қайың, алма және алмұрт көшеттері болды. Сол кезде аудан әкімдігі әр ағаштың мамандар бақылауында болатынын және жасыл желекті суару жүйесі кеңейтілетінін мәлімдеген.
Күзде де көгалдандыру жалғасты. Тәшенов скверіндегі акцияға 160 адам, соның ішінде ардагерлер мен студенттер қатысып, тағы шамамен 100 ағаш отырғызылған. Сол кезеңдегі мәлімет бойынша, бір жылдың ішінде Байқоңыр ауданында 3 мыңға жуық ағаш және 460-тан астам бұта егілген.
Ағашты отырғызудан кейінгі күтім шешуші болады
Елордадағы көгалдандыру жұмыстары үшін көшеттердің саны ғана емес, олардың кейінгі күтімі де маңызды.
Бұған дейін Байқоңыр ауданы әкімдігі отырғызылған ағаштарды агрономдар қадағалайтынын, жыл ішінде бірнеше агротехникалық жұмыс жүргізілетінін және жекелеген жасыл аумақтарға суару жүйесі тартылғанын хабарлаған.
Сондықтан Абай даңғылындағы 140 жаңа ағаштың нәтижесі де бір күндік акциямен емес, көшеттердің жерсінуі және кейінгі күтімімен өлшенеді.
Бұған дейін де елорданың осы ауданындағы көгалдандыру жұмыстары туралы жазған едік: Байқоңыр ауданындағы «Коммуналшылар саябағына» бір акция кезінде 250 ағаш отырғызылған. Оған «Астана Су Арнасы», «Астана Теплотранзит», «Елорда экосистем» және АРЭК қызметкерлері қатысқан.
