Кеңестің толық құрамы бекітілді.
Қазақстан Халық Кеңесіне 126 адам кірді. Жаңа орган тек кеңес берумен шектелмейді: ол Құрылтайға заң жобаларын ұсына алады және республикалық референдум өткізу туралы бастама көтеруге құқылы, деп хабарлайды DKNews.kz.
22 қыркүйекте Қазақстан Президенті Қасым-Жомарт Тоқаев Қазақстан Халық Кеңесінің құрамын бекіту туралы Жарлыққа қол қойды. Құжат қол қойылған күннен бастап күшіне енеді.
Жарлық «Қазақстан Халық Кеңесі туралы» Конституциялық заңның 5-бабы 1) тармақшасына сәйкес қабылданды.
126 орын үш бағыт бойынша тең бөлінді
Қазақстан Халық Кеңесінің құрамы «Қазақстан Халық Кеңесі туралы» Конституциялық заңда белгіленген тәртіппен жасақталды.
126 орын үш топқа тең бөлінген. Кеңес құрамына этномәдени бірлестіктерден 42 өкіл, қоғамдық бірлестіктер мен өзге де коммерциялық емес ұйымдардан 42 адам, сондай-ақ Астана, облыстар және республикалық маңызы бар қалалардың мәслихаттары мен қоғамдық кеңестерінен 42 өкіл кірді.
Кеңес мүшелерінің өкілеттік мерзімі — төрт жыл.
Бекітілген құрамда мәслихаттар мен қоғамдық кеңестердің, этномәдени бірлестіктердің, кәсіподақтардың, білім, ғылым, бизнес, спорт, медиа және қоғамдық ұйымдардың өкілдері бар. Олардың қатарында Мұрат Әбенов, Бағдат Мусин, Нұртөре Жүсіп, Роза Мұқанова, Ерлан Нысанбаев, Ләззат Қалтаева және басқа да азаматтар бар.
Халық Кеңесі Құрылтайға заң жобаларын ұсына алады
Жаңа органның басты ерекшелігі — оның өкілеттігі тек қоғамдық пікір білдірумен шектелмейді.
Заң бойынша Қазақстан Халық Кеңесі ішкі саясаттың негізгі бағыттары бойынша ұсыныстар әзірлейді, Құрылтайға заң жобаларын енгізе алады және республикалық референдум тағайындау туралы бастама көтеруге құқылы.
Кеңес сондай-ақ қоғамдық тыңдаулар мен консультациялар өткізіп, заңда белгіленген тәртіппен қоғамдық бақылау жүргізе алады.
Заң жобасын енгізудің жеке рәсімі бар. Мұндай бастаманы Кеңес мүшелерінің кемінде үштен бірі немесе оның Төралқасы көтере алады.
Ал заң жобасын Құрылтайға жолдау туралы шешім Кеңес сессиясында барлық мүшенің кемінде үштен екісінің дауысымен қабылданады.
Яғни 126 адамнан тұратын жаңа құрам қоғамдық бастамаларды тікелей заң шығару деңгейіне шығаруға мүмкіндік беретін нақты тетікке ие болды.
Кеңес мүшелері қоғамдық негізде жұмыс істейді
Қазақстан Халық Кеңесіне мүшелік жеке ақылы қызмет болып саналмайды. Заңда Кеңес мүшелерінің қоғамдық негізде жұмыс істейтіні көрсетілген.
Этномәдени бірлестіктерден, қоғамдық ұйымдар мен коммерциялық емес құрылымдардан ұсынылатын кандидаттарға тәжірибе бойынша да талап қойылады. Олардың кемінде үш жыл қоғамдық қызмет тәжірибесі болуы тиіс, соның ішінде тиісті ұйымда кемінде бір жыл жұмыс істеген болуы қажет.
Қазақстан Халық Кеңесінің мүшесі 18 жасқа толған Қазақстан азаматы бола алады.
Сонымен қатар заң Кеңес ішінде этностық, діни, партиялық немесе өңірлік белгі бойынша бірлестіктер құруға тыйым салады.
Кеңес мемлекеттік басқару жүйесіндегі жаңа институтқа айналды
Қазақстан Халық Кеңесі Конституцияда Қазақстан халқының мүддесін білдіретін жоғары консультативтік орган ретінде бекітілген. Кеңестің заң шығару бастамасы құқығы да конституциялық деңгейде қарастырылған.
Бұған дейін Қасым-Жомарт Тоқаев Халық Кеңесінің алғашқы құрамы қыркүйектің екінші жартысында жасақталатынын айтқан еді. 22 қыркүйектегі Жарлық осы үдерістің негізгі кезеңін аяқтады.
Ендігі басты мәселе — 126 адамның тізімі емес, жаңа құрам қандай бастамалар көтеретіні. Кеңестің нақты саяси және қоғамдық салмағы оның заң шығару бастамасы мен референдум ұсыну құқығын іс жүзінде қалай пайдаланатынынан көрінеді.
Бұған дейін біз Қазақстан Халық Кеңесінің құрылуы және оның жаңартылған мемлекеттік институттар жүйесіндегі орны туралы жазған едік.
