Сақтандыру төлемі күндерге қысқарды.
Қазақстандық сақтандырушылар спутниктік деректер мен жасанды интеллектті полисті рәсімдеуден бастап шығынды бағалауға дейін енгізіп, бұрын қолмен атқарылатын процестерді автоматтандырып жатыр, деп хабарлайды DKNews.kz.
Freedom Insurance дерегінше, компания сақтандыру төлемін орта есеппен бес күн ішінде жүргізеді. Ал агросақтандырудағы жекелеген жағдайлардың бірінде қаражат бір күннің ішінде төленген.
Спутник егістіктегі дақылды да тексереді
Цифрландырудың ең көрнекі мысалдарының бірі ауыл шаруашылығында байқалады. Freedom Insurance өнімділіктің төмендеуінен туындайтын күтпеген шығындарды ерікті сақтандыруға арналған параметрлік өнімді іске қосты.
Модель үш негізгі дерекке сүйенеді: топырақ, климат және агротехнология. Соңғысына белгілі бір дақылдың вегетациялық кезеңі, себу мерзімі және басқа көрсеткіштер кіреді.
Өнімділікті модельдеу кезінде АҚШ-тың Praedictus компаниясының деректері де қолданылады. Жүйе соңғы 45 жылдағы өнімділік көрсеткіштерін талдап, әр алқаптың ерекшелігіне қарай жеке модель құра алады.
Полис арнайы цифрлық платформада рәсімделеді. Ол мемлекеттік деректер базаларымен интеграцияланған және егістік алқаптар жөніндегі спутниктік мәліметтерді жинайды.
Спутниктік суреттер мен машиналық оқыту алгоритмдері сақтандырылған жерге полисте көрсетілген дақылдың шынымен егілгенін тексереді. Жүйе себу мерзімдерін, вегетациялық индекстерді салыстырып, сақтандыру жағдайы бойынша цифрлық дәлелдер базасын қалыптастырады.
Қазақстанда ғарыштық мониторингтің сақтандырудағы рөлі бұған дейін де талқыланған. Біз спутниктік технологиялар табиғи тәуекелдерді бағалау тәсілін қалай өзгертіп жатқанын жазғанбыз.
«Биыл біз төлемді бір күннің ішінде жүзеге асырған нақты жағдайға куә болдық», — деді «Freedom Insurance» СК» АҚ Агросақтандыру басқармасының бастығы Диас Ерғалиев.
7,8 мың гектардың 24 алқабында сақтандыру жағдайы тіркелді
Компания келтірген деректер бойынша, жалпы аумағы 7,8 мың гектар болатын жеті ауыл шаруашылығы тауар өндірушісі сақтандырылған. Олардың иелігіндегі 29 егістік алқаптың 24-інде параметрлік жүйе сақтандыру жағдайын тіркеген.
Залал тіркелген алқаптардың басым бөлігінде зығыр өсірілген.
Жалпы сақтандыру төлемдері 231 млн теңгеге жеткен. Оның 96%-ы зығыр бойынша төлемдерге тиесілі.
Мұнда фермер үшін негізгі айырмашылық — залалды дәлелдеу процесінің өзгеруі. Спутниктік бақылау мен алдын ала белгіленген параметрлер сақтандыру жағдайын бағалауда субъективті факторды азайтып, тексеруге кететін уақытты қысқартуға мүмкіндік береді.
«Орталық Азиядағы климаттық өзгерістер әлемдік орташа көрсеткішке қарағанда әлдеқайда жылдам жүріп жатқанын ескерсек, бұл өзгерістерге мүмкіндігінше тез бейімделу қажет. Мұндай жағдайда фермерлерге сақтандыру жүйесі ұсынатын сенімді қорғаныс керек. Сондықтан климаттың өзгеруіне бейімделу тек технологияларды өзгерту немесе төзімділігі жоғары дақылдарды таңдау ғана емес, агросақтандыруды тиімді қолдануды да қамтиды», — деді Диас Ерғалиев.
Әрбір үшінші қоңырауға AI қатысады
Жасанды интеллект сақтандыру жағдайын реттеумен ғана шектелмейді. Компания клиенттің тәуекелін бағалау үшін бірнеше жыл ішінде 2 мыңнан астам предикторды, яғни параметрді жинақтаған.
Олардың арасында клиент сауалнамасындағы базалық ақпараттан бастап сақтандыру тарихына дейінгі деректер бар. Сол мәліметтер полис құнын тәуекел деңгейіне қарай есептейтін автоматты скоринг жүйесінде қолданылады.
AI колл-орталыққа да кірді. Бастапқыда жүйе жиі қойылатын сұрақтарды анықтаса, қазір AI-агент 25-тен астам сұраққа жауап беріп, клиенттің келесі сауалын болжауға тырысады.
Компания мәліметінше, Freedom Insurance-те әрбір үшінші қоңырауға жасанды интеллект көмегімен қызмет көрсетіледі.
AI мен скоринг сақтандырудағы тәуекелдерді бағалауға бұған дейін де енгізілген. Біз нейрожелілердің сақтандыру алаяқтығын анықтауда қалай қолданылып жатқанын да жазғанбыз.
Көлік залалын видео арқылы бағалау жеделдейді
Автосақтандыруда келесі кезең — зақымды видео арқылы бағалап, есеп шыққаннан кейін төлем процесін барынша қысқарту.
Freedom Insurance деректерді талдау департаментінің директоры Жанат Романованың айтуынша, компания сақтандыру төлеміне дейін клиент өтетін процестерді цифрландырған.
«Сондықтан компания төлемді алу кезінде клиент өтетін барлық үдерісті цифрландырды. Қазіргі уақытта біз төлемді орта есеппен 5 күн ішінде жүзеге асырамыз», — деді Жанат Романова.
Компания AI технологияларын көліктің зақымын бағалау жүйесіне де енгізіп жатыр. Романованың сөзінше, алғашқы нәтижелер есеп дайындау уақытын 30%-ға қысқартқан.
«Біз қазірдің өзінде бұл үдеріске AI технологияларын енгізіп жатырмыз және алғашқы нәтижелеріміз бар. Есепті дайындау уақытын 30%-ға қысқарттық. Жыл соңына дейін бұл көрсеткішті 50%-ға жеткіземіз деп үміттенемін. Біз оқытқан жүйе қазірдің өзінде ұсақ та, ірі де зақымдарды анықтай алады. Есептердің басым бөлігін толықтай онлайн режимде қалыптастыра бастаған кезде, AI-агенттердің көмегімен қосалқы бөлшектердің құнын анықтап, клиентке төлемді жүзеге асыра аламыз», — деді ол.
Қазақстанда жол-көлік оқиғаларын онлайн реттеу тәжірибесі де кеңейіп келеді. Бұған дейін біз сақтандыру жағдайын цифрлық сервистер арқылы рәсімдеу уақыты қалай қысқарғанын жазған едік.
Freedom SuperApp сақтандырушыға дайын аудитория беріп отыр
Цифрландырудың тағы бір экономикалық әсері клиент тарту моделінен көрінеді. Freedom Insurance басқарма төрағасы Азамат Керімбаевтың айтуынша, сақтандыру компаниясынан Freedom SuperApp-қа тәулігіне 1,5 мыңға дейін клиент өтеді.
Бұл жерде сақтандырушының міндеті жаңа аудиторияны нөлден іздеуден гөрі экожүйедегі пайдаланушыға қажетті өнімді дұрыс уақытта ұсынуға ауысады.
Freedom SuperApp аудиториясы, Керімбаев келтірген дерек бойынша, 6 млн пайдаланушыға жетеді.
«Күн сайын Freedom Insurance компаниясынан 1,5 мыңға дейін клиент Freedom SuperApp-қа келеді. Сондықтан пайдаланушылардың сұраныстарын тек сақтандыру компаниясы деңгейінде ғана емес, бүкіл экожүйе деңгейінде сапалы өңдеу маңызды. Өз кезегінде сақтандыру компаниясына клиенттерді іздеудің қажеті жоқ, өйткені олар экожүйеде қазірдің өзінде бар. Бізге сақтандырушы ретінде қосымшаның 6 млн пайдаланушысына қажет өнімдер мен қызметтерді ұсыну маңызды», — деді Азамат Керімбаев.
Осы модельде жылдам төлем мен ыңғайлы цифрлық сервис сақтандыру компаниясының жеке көрсеткіші ғана болмайды. Клиент бүкіл экожүйеге берген бағасын оның ішіндегі әр сервистің сапасына қарай қалыптастырады.
Сондықтан бәсеке полистің бағасымен қатар сақтандыру жағдайын қанша күнде тіркеуге, залалды алгоритм қаншалықты дәл бағалайтынына және клиент ақшасын қаншалықты тез алатынына ауысып келеді.
Компанияның қазіргі көрсеткіші — төлемге орта есеппен бес күн. Агросақтандырудағы жекелеген жағдайда бұл процесс бір күнге дейін қысқарған.
