Сейсенбі күні жарияланған ресми мәліметтер бойынша, Қытайдың жалпы тауар импорты мен экспорты жылдық есептеуде биылғы жылдың алғашқы он айында 0,03 пайызға артып, 34,32 триллион юаньға жетті (шамамен 4,78 триллион АҚШ доллары).
ҚХР Бас кеден басқармасының мәліметі бойынша, қаңтар-қазан кезеңінде экспорт жылдық есептеуде 0,4 пайызға өсіп, 19,55 триллион юаньға жетті, ал импорт өткен жылмен салыстырғанда 0,5 пайызға азайып, 14,77 триллион юаньді құрады. Мәліметтер көрсеткендей, тек қазан айында елдің сыртқы саудасы өткен жылмен салыстырғанда 0,9 пайызға өсіп, 3,54 трлн юаньға жетті. Қытайдың экспорты өткен айда жылдық есептеуде 3,1 пайызға төмендесе, импорт 6,4 пайызға өсті. 2023 жылдың алғашқы он айында Оңтүстік-Шығыс Азия елдерінің қауымдастығы (АСЕАН) Қытайдың ең ірі сауда серіктесі болып қала берді. Қытайдың АСЕАН елдерімен саудасы жылдық есептеуде 0,9 пайызға өсіп, 5,23 триллион юаньға жетті, бұл елдің жалпы саудасының 15,2 пайызын құрайды.
Қаңтар мен қазан айлары аралығында Қытайдың Еуропалық Одақпен саудасы өткен жылмен салыстырғанда 1,6 пайызға, ал Америка Құрама Штаттарымен саудасы жылдық есептеуде 7,6 пайызға қысқарды. Қытайдың «Белдеу және жол» елдерімен саудасы жылдық есептеу бойынша 3,2 пайызға өсті. Мәліметтерді бөліп көрсеткенде, Қытайдың жалпы экспорттың 58,5 пайызын құрайтын машина жасау және электронды өнім экспорты кезең ішінде 2,8 пайызға өсті, ал автомобиль экспортының құны өткен жылмен салыстырғанда 88,5 пайызға өсті.
