Қытай Халық Республикасы құрылғаннан бергі өткен 75 жыл ішінде елдің экономикалық қуаты, ғылыми-техникалық әлеуеті және мемлекеттің жиынтық күші айтарлықтай артып, оның халықаралық ықпалы едәуір жоғарылады, делінген ҚХР Мемлекеттік статистикалық басқармасы жариялаған есепте.
1979 жылдан 2023 жылға дейін Қытайдың орташа жылдық экономикалық өсімі 8,9 пайызды құрап, сол кезеңдегі дүниежүзілік экономикалық өсім 3 пайыздан әлдеқайда асып түсті. Есепке сәйкес, осы кезеңде Қытайдың әлемдік экономиканың өсуіне қосқан жылдық орташа үлесі 24,8 пайызды құрап, әлемде бірінші орынға шықты.
Төменде елдің соңғы 75 жылдағы негізгі экономикалық жетістіктерінің кейбірі берілген:
– 1952 жылы Қытайдың жалпы ішкі өнімі небәрі 30 млрд АҚШ долларын құрады. 1978 жылы елдің жалпы ішкі өнімі 149,5 млрд АҚШ долларына дейін өсті, бұл жаһандық экономиканың 1,7 пайызын құрады. Реформа мен ашықтық саясаты жүзеге асырылғалы бері Қытайдың жалпы экономикалық өнімі өсе берді. 2023 жылы Қытайдың жалпы ішкі өнімі 17,8 трлн АҚШ долларына жетіп, жалпы әлемдік көлемнің 16,9 пайызын құрады, бұл елдің әлемдегі екінші ірі экономика ретіндегі позициясын нығайтты.
– 1985 жылы Қытайда патент алуға берілген өтінімдердің саны 8558 болды. 2011 жылы олардың жалпы саны 526 мың бірлікке дейін өсіп, Қытайды осы саладағы әлемдік көшбасшыға айналдырды. 2022 жылдың аяғында Қытайда қабылданған өнертабысқа патенттік өтінімдердің саны 1,619 миллионға жетті, бұл Қытайға әлемдегі осы саладағы жетекші позициясын бекітуге мүмкіндік берді.
– 1950 жылы Қытайдың сыртқы тауар саудасы небәрі 1,1 млрд АҚШ долларын немесе жалпы әлемдік көлемнің 0,9 пайызын құрады. 2013 жылы Қытай әлемдегі ең ірі тауар саудасы еліне айналды. Өткен жылдың соңында елдің жалпы тауар саудасы 5,9 трлн АҚШ долларына жетіп, жалпы әлемдік көлемнің 12,4 пайызын құрады. Қытай жеті жыл қатарынан бұл көрсеткіш бойынша дүние жүзінде бірінші орында тұр.
– Қызметтер саудасы да айтарлықтай кеңейді. ҚХР құрылуының бастапқы кезеңінде елдегі қызметтер саудасының көлемі іс жүзінде нөлге тең болды. 2023 жылы Қытайдың қызметтер импорты мен экспортының жалпы көлемі 933,1 млрд АҚШ долларына жетіп, әлемде төртінші орынға шықты.
