Бейжіңдегі Халық жиналысы үйінде бейсенбі күні Бүкілқытайлық халық өкілдері жиналысының (БХӨЖ) 14-шақырылымының 4-сессиясы ашылды, деп хабарлайды Xinhua.
Сессияның ашылуына ҚХР Төрағасы Си Цзиньпин және партия мен мемлекет басшылығының басқа да жетекшілері қатысты.
Үкіметтің жұмысы туралы есепте атап өтілгендей, Қытай 14-бесжылдық кезеңінде (2021–2025 жж.) жаңа әрі маңызды жетістіктерге қол жеткізді. Ел экономикасының жалпы көлемі жаңа деңгейге көтерілді. Осы кезеңде Қытайдың жалпы ішкі өнімі жыл сайын орта есеппен 5,4 пайызға өсіп отырды, бұл әлемдік орташа көрсеткіштен едәуір жоғары.
Есепте соңғы бес жыл ішінде ғылыми-технологиялық және өнеркәсіптік инновациялар саласында жаңа серпілістер жасалғаны айтылды. Ғылыми-зерттеу және тәжірибелік-конструкторлық жұмыстарға жұмсалатын шығындардың орташа жылдық өсімі 10 пайызды құрады.
Реформаларды жүргізу мен ашықтықты кеңейту бағытында да жаңа қадамдар жасалды. Қытай тауар саудасы көлемі бойынша әлемдегі ең ірі ел ретіндегі позициясын одан әрі нығайтты.
Халықтың әл-ауқаты да жаңа деңгейге көтерілді. Жан басына шаққандағы қолда бар табыс жыл сайын орта есеппен 5,4 пайызға өсіп отырды. Қалалар мен елді мекендерде жұмыспен қамтылғандар саны 60 млн адамнан астамға артты. Халықтың орташа өмір сүру ұзақтығы 79,25 жасқа жетті.
Экологиялық өркениетті дамытуда да жаңа жетістіктерге қол жеткізілді. Есепке сәйкес, Қытай орман ресурстарының өсу қарқыны мен көлемі бойынша әлемде бірінші орынға шықты. Сонымен қатар елде әлемдегі ең ірі әрі қарқынды дамып келе жатқан жаңартылатын энергия көздері жүйесі қалыптасты.
