Сәуір айының соңында Қытайдың орталық бөлігіндегі Хунань провинциясының Юэян қаласында орналасқан барбекю колледжінде 2026 жылғы алғашқы оқу курсы басталды.
2025 жылғы шілдеде құрылған Юэян барбекю колледжі — елдегі барбекю шеберлерін даярлауға маманданған алғашқы оқу орны. Юэян қаласы бұл тағамды дайындаудың бай аспаздық дәстүрімен танымал. Ашық деректерге сәйкес, мұнда 2 мыңнан астам барбекю мейрамханасы бар, ал саланың жылдық айналымы 2 млрд юаньнан (шамамен 292,5 млн АҚШ доллары) асады.
Колледж мәліметінше, жаңа курс 30 күнге созылады, ал оқу құны бір адамға 5800 юаньды құрайды. Алдын ала тіркелген 4 мың үміткердің ішінен 30 тыңдаушы іріктеліп алынған.
Колледж негізін қалаушы Цзян Цзунфудың айтуынша, тыңдаушылар әртүрлі жас санатынан және білім деңгейлері әрқалай. Олардың қатарында бұл саланы жаңадан бастаған жастар да, қоғамдық тамақтандыру саласында мол тәжірибесі бар аспаздар да бар.
«Емтиханды сәтті тапсырғаннан кейін қатысушылар Қытай тағамдары шеф-аспаздарының кәсіби біліктілік деңгейі туралы сертификат алады. Оны ҚХР Адам ресурстары және әлеуметтік қамсыздандыру министрлігі береді. Сонымен қатар Юэян барбекю колледжін тәмамдағаны туралы сертификат тапсырылады», — деді Цзян Цзунфу. Оның айтуынша, колледж қызметі жұмыспен қамтуды кеңейтуге және кәсіпкерлікті дамытуға бағытталған. Алдағы 3–5 жыл ішінде 10 мың барбекю аспазын даярлау жоспарланып отыр.
Юэян барбекю колледжі ашылғанға дейін Қытайда бірнеше ерекше оқу орындары құрылған болатын. Олардың қатарында Хубэй провинциясының Цяньцзян қаласындағы шаяндар академиясы, Гуанси-Чжуан автономиялық ауданындағы Лючжоу қаласындағы «Лосыфэнь» ұлут кеспесі академиясы, сондай-ақ Гуандун провинциясындағы алғашқы райдерлер колледжі бар.
Райдерлер колледжі — жергілікті білім беру департаменті мен қытайлық JD.com компаниясының бірлескен жобасы. Бұл оқу орны кәсіби-техникалық университет базасында курьерлерді даярлауға арналған.
Бағдарлама жол қозғалысы қауіпсіздігі мен еңбек құқықтары сияқты базалық пәндерден басталып, жасанды интеллектке негізделген диспетчерлік платформаларды пайдалану, автономды жеткізу жабдықтарына қызмет көрсету, суық тізбекті логистиканы басқару және өңірлік үйлестіру сияқты тереңдетілген пәндерді қамтиды.
Колледж курьерлер мен жеткізу қызметкерлері сияқты алдыңғы шептегі мамандарға арналған көпдеңгейлі және икемді оқыту бағдарламаларын ұсынады. Негізгі оқу ақысын олардың жұмыс беруші платформалары төлейді.
Соңғы жылдары Қытай кәсіби білім беруді дамытуға ерекше назар аударып келеді, өйткені бұл сала халықты жұмыспен қамтуды арттыруда маңызды рөл атқарады. Қазіргі таңда елде әлемдегі ең ірі кәсіби білім беру жүйесі қалыптасқан. ҚХР Білім министрінің орынбасары Сюн Сыхаоның айтуынша, елде 9302 орта кәсіптік оқу орны, 1562 жоғары кәсіптік оқу орны және 87 бакалавр деңгейіндегі оқу орны жұмыс істейді. Бұл оқу орындарында жалпы саны 34 млн адам білім алуда.
Сонымен қатар жаңа тұтынушылық сұраныстарға байланысты жаңа мамандықтар үнемі пайда болып келеді. 2021–2025 жылдар аралығында Қытайда ресми түрде 72 жаңа мамандық бекітілді.
2025 жылғы шілдеде ҚХР Адам ресурстары және әлеуметтік қамсыздандыру министрлігі 17 жаңа мамандық пен 42 жаңа еңбек санатын жариялады. Олардың қатарында барбекю аспазы және генеративті жасанды интеллект негізінде контент жасаушы мамандығы да бар.
