2026 жылдың сәуір айында Қытайда жаңа энергия көздеріндегі көліктердің (NEV) өндірісі мен сатылымы жылдық есепте өсуді жалғастырды.
Бұл туралы дүйсенбі күні Қытай автомобиль өнеркәсібі қауымдастығының (CAAM) жариялаған деректерінде айтылды.
Статистикаға сәйкес, сәуір айында елде 1,32 миллион NEV-көлігі өндіріліп, сатылым көлемі 1,34 миллион бірлікке жетті. Бұл көрсеткіштер өткен жылдың сәйкес кезеңімен салыстырғанда тиісінше 5,5 пайызға және 9,7 пайызға артқан. Сонымен қатар жаңа энергия көздеріндегі көліктердің сатылым үлесі Қытай нарығындағы жаңа автомобильдердің жалпы сатылымының 53,2 пайызын құрады.
2026 жылдың алғашқы төрт айында Қытайда өндірілген және сатылған NEV-көліктер саны тиісінше 4,29 миллион және 4,3 миллион бірлікке жетті. Сонымен қатар қытайлық автомобильдердің экспорты айтарлықтай өсті: қаңтар–сәуір аралығында шетелге 3,13 миллион көлік жеткізілді, бұл өткен жылмен салыстырғанда 61,5 пайызға көп. NEV-көліктер экспорты бірден 120 пайызға өсіп, 1,38 миллион бірлікке жетті.
CAAM жауапты хатшысының орынбасары Чэнь Шихуа мемлекеттік қолдау мен тұтынуды ынталандыруға бағытталған соңғы шаралар ішкі сұранысты күшейтуге, сыртқы сауданы кеңейтуге және Қытай автомобиль өнеркәсібінің тұрақты әрі сапалы дамуына ықпал етіп отырғанын айтты.
